Ora division drenta un famia, orguyo ta para su tras, ora hende ta kere cu nan ta mihor cu otro y ta wak otro cu menosprecio, esey ta nifica presencia di division.
Hende cu ta causa division ta hende carnal, pasobra bo ta mira e obra di carni presente( Galationan 5:19-21).
Nan tin goso constante den pleito y rabia, nan cuminda ta pone hende contra otro y asina nan por probecha pa nan propio interes.
Dios ta stima union, hende cu ta stima division no ta stima Dios, hende cu ta lanta pleito den famia, no ta stima su famia, hende cu ta stimula division den pueblo no ta stima e pueblo pasobra tur hende sa ken ta biba y ta gosa ora tin division no lubida riba dje ( Juan 10:10).
Den cas caminda tin division, e presencia di Spirito Santo ta haci hopi falta, den tur organisacion cu ta promove division, no ta importa con grandi of con sabi nan ta , nan curason ta leu for di Dios.
E enemigo ta asina sabi cu e a cambia nomber di division y pone hende kere cu esey ta yama un “Lucha”. Un lucha cu por bay mas cu siglo, pasobra mientras cu tin division, no tin crecemento y no tin pas, un ta traha y otro ta kibra , un ta sembra y e otro ta ranca.
Bo sa kico ta tristo un hende planta un mata, y ta bin un otro su tras y e ta keda sin muha e mata pa e sigi crece, djis pa demostra y promove division. Awor puntra bo mes ken tin ganashi caminda tin division?
Caminda tin division hende ta bira ciego, y nan no por hanja caminda pa solucion, nan ta sinta planea anja tras di anja, pero no por tin asercamento caminda opinion ta dividi.
Si dos mayor ta dividi, nan no tin comunicacion, nan no tin compromiso, nan no tin responsabilidad, con nan ta bay dirigi nan yuinan, ta di unda e muchanan lo hanja carinjo, respet , amor y bon ehempel?
Palabra di Dios ta bisa: Awor mi ta exhorta boso, rumannan, pa medio di e nomber di Senjor Hesus Cristo, pa boso tur papia e mesun cos y pa no tin division , ma pa boso ta perfectamente uni den e mesun mente y den mesun opinion.( 1 Corintionan 1:10).
Dios ta Dios di union, pasobra union ta refleha e curpa di Cristo, caminda nos tur ta den un curpa y un fe, caminda tur ta bonbini, pasobra Cristo Hesus a entrega su bida pa nos tur. Y no lubida cu Dios a stima e mundo..
Cuanto morto, y dolor nos ta mira den paisnan bisinja y paisnan cu ta leu pa motibo division politico.
Bo sa cu e spirito di division ta asina fuerte cu e ta cuminsa manera un fanaticada politico, despues e ta bira odio politico personal, y habri caminda pa vengansa politico.
Haci mi goso completo door di keda di acuerdo cu otro, manteniendo e mesun amor, uni den spirito, teniendo un solo proposito.( Filipensenan 2:2).
E spirito di division ta mantene hende ciego y sordo, pa nan keda bao di obediencia di scuridad, pa nan keda bobo y no kier reconoce e berdad, cu Dios kier pa tur hende conoce.
Si un hende ta bisa e ta stima Dios, y ta odia su ruman, e ta un ganjado. Pasobra esun cu no ta stima su ruman cu e a mira,no por stima Dios , Kende e no a mira.( 1 Juan 4:20).
Amor di Dios ta corre cu division.
Sinceramente, Pastor Marcel Balootje
