Den politica, memoria sa ta cortico. Awe, hopi ta esnan cu kier rindi tributo na Henny Eman como e “stateman” di Aruba. Pero e papel y e cifranan no ta gaña. Tras di e bunita palabranan di “Jobs, Hope and Prosperity”, a sconde un era di corupcion structural, coneccion cu mafioso internacional y un maneho financiero cu a hinca e futuro di nos yiunan den un hunder pisa.
1. E Estafa di Siglo: Fondo Desaroyo San Nicolas
Si nos papia di malversacion, mester cuminza na San Nicolas. E famoso Fondo Desaroyo San Nicolas tabata e neishi caminda mas cu 52 miyon florin di pueblo a disparce. No tabata un “eror”, tabata un plan structural pa enrikece “compinchinan” y comerciantenan faborito di AVP. Esaki no ta un opinion: e condena di ex-minister Tico Croes den Corte di Husticia ta e prueba bibo cu e gobierno ey a sinta pa horta pueblo den su cara.
2. Garantianan Hotelero: Aruba como “banco” di Mafioso
Un di e pasonan mas criminal contra e cartera di pueblo tabata e Garantianan Hotelero. Henny Eman a uza credito di pais Aruba pa bira garantia di inversionistanan dudoso.
E caso di Spartaco Ghini, un Italiano cu lazonan scur, kende a ricibi fabor y proteccion politico mientras e tabata hinca Aruba den debe. El’a haya 3 proyecto pa traha, pa cual Gobierno a duna e banco SACE garantia, Na fin di dia Aruba a keda sin hotel y cu debe di 400 miyon florin. E banco a demanda Aruba na Hulanda y a gana!
Den rapport di investigacion di ROSA Recherche team, ta poni riba pagina 42, cu tur siman, Spartaco ta entrega Henny un check di 50 mil florin. Ora a puntra Henny, el’a bisa cu ta bbq el’a bende.
Ora e proyectonan aki a fracasa, manera e Ramada, BETA HOTEL, ta ABO, e ciudadano cu ta paga belasting, mester a carga cu e debe di miyones di dollars aki. Esaki a crea un buraco financiero cu a obliga gobierno pa paga tr cu 2018! ( 32 anja) masacrando e poder di compra di e trahador Arubiano.
3. E coneccion cu mafia: Cosa Nostra na Aruba
Bou di e capa di “turismo”, Henny Eman a habri porta pa e clan Cuntrera-Caruana, conoci internacionalmente como e bankeronan di e mafia Siciliano. Ora e minister Berlinski a nenga di duna nan permiso pa motibonan di seguridad, Henny Eman mes a intermedia. Den un movecion politico sushi, a core cu Berlinski, Henny a tuma e cartera y, via su ruman muher como notario, a duna e mafiosonan e permisonan cu nan tabata kier. Esaki a hiba Aruba directamente riba e “Lista Preto” di Bill Clinton na 1996, caminda Merca a declara Aruba oficialmente como un “Hub” pa labamento di placa y narcotrafico.
4. Interbank y FCCA: Robo den pleno luz di dia
E sinverguenzura di mas grandi tabata e caso di Interbank. Mientras pueblo tabata biba den scarsedad, famia Eman y e cupula di AVP tabatin debenan miyonario na e banco aki cu 0% di interes. Ora Interbank a kibra, e gobierno di Henny, via Frank Hoeverts a percura pa FCCA (placa pa cas di pueblo) cumpra e banco pa 1 florin, absorbando e debednan di e politiconan Henny y Mike. Basicamente, e placa cu mester a bay pa traha cas pa esnan cu mas mester, a wordo uza pa “laba” e debenan personal di e lidernan di AVP.
5. Watty Vos y e KB di 1994: Dictadura den democracia
Henny Eman no tabata tolera control. Na 1994, e la yega na e extremo di pidi un Decreto Real (KB) for di Reina Bearrix pa pone su mesun Minister di Husticia, Watty Vos, bou di “curatela”. Pakico? Pasobra e investigacionnan di Veiligheidsdienst tabata yega demasiado cerca di e “donacionnan” y e actonan corrupto di su gabinete. E la sacrifica e integridad di nos husticia pa proteha su mes y su partido.
Un herencia di debe y berguenza
Henny Eman no a laga un Aruba prospero; e la laga un Aruba financieramente na “werki”, un pais cu a perde su prestigio internacional y un pueblo obliga pa paga debenan di hotelnan fantasma y placa di campaña.
Prome cu celebra su nomber, recorda e 50 miyon dollar di e Race Track fantasma, recorda e desmantelacion di Lago cu el’a firma na 1988 pa laga San Nicolas den scuridad, y recorda cu cada florin cu bo paga na belasting awe, ainda ta bay pa tapa e buraconan cu e añanan ey a crea.
