Prof. dr. Francio Guadeloupe, profesor extraordinario, “Publieke Antropologie van Koninkrijksrelaties’ a tene su “oratie”como aceptacion di e catedra di e mesun indolo. Entre e invitadonan tabata tambe presenta Minister Plenipotenciario di Aruba Mildred Schwengle.
Su “oratie” cu a hiba e titulo di ‘Reweaving Dutch Caribbean studies’ ta profundisa diferente aspectonan di su investigacion. E ta presenta personan cu ela drenta den contacto cu nan y den su combersacionnan cu nan, e ta puntra nan riba nan identidad. Como ehempel Guadeloupe ta conta di un señora Hulandes-Europeo cu ela encontra abordo di un vuelo di Amsterdam pa Boneiro. Of tambe e Arubiana cu a regresa Aruba y ta traha den e sector di turismo na unda e señora ta drenta den contacto cu empleadonan Venezolano. Den su investigacion Guadeloupe ta hopi critico riba con personal Latino-americano ta wordo trata y wordo mira. Den e mesun rosea e ta trata e dominio total di e industria di turismo y e consecuencianan cu esaki tin riba e diferente islanan den Caribe.
Francio Guadeloupe como antropologo ta concentra riba cuater area pa su investigacion di cual tur ta concentra riba con hende den diferente parti di Reino Hulandes ta duna contenido na nan bida, con nan ta muda entre a paisnan di Reino y kico esaki ta haci cu nan identidad.
Na final Minister Plenipotenciario Mildred Schwengle a felicita Francio Guadeloupe cu su funcion nobo y a bisa cu Aruba ta sumamente orguyoso cu e logro aki di un profesional Arubiano. E mandatario a bisa cu esaki ta un culminacion riba su trabao y tur e investigacionnan y a expresa su aprecio pa esaki. Francio Guadeloupe ta traha pa e “Koninklijk Instituut voor Taal-, Land- en Volkenkunde (KITLV)” y pa Universidad di Amsterdam.
