Den un ceremonia oficial na PostAruba N.V., Minister di Finansa, Asunto Economico y Sector Primario, mr. Geoffrey Wever, a participa na e desvelo di un stampia conmemorativo na honor di e prome Prome Minister di Aruba, defunto senor Jan Hendrik Albert ‘Henny’ Eman.
Durante su discurso, Minister Wever a indica cu e ta un honor pa por a hiba algun palabra, reconociendo e importancia historico di e momento.
Henny Eman tawata un figura clave den historia y desaroyo di Aruba, especialmente den e periodo despues cu Aruba a drenta Status Aparte. Durante e temporada di su liderazgo, Aruba a confronta un momentonan dificil, incluyendo e impacto di e ceramento di e rafinaderia Lago na 1985 y e desempleo cu a sigui.
El a destaca cu, apesar di e retonan aki, e liderazgo di Henny Eman a logra crea e fundeshi pa crecimiento economico, cu enfoke riba desaroyo di turismo como un di e pilarnan principal di economia. Atraendo partnersnan internacional pa inverti na hotelnan y desaroyo, Aruba a logra transforma su industria turistico y crea oportunidadnan nobo pa trabou y enseñansa.
Minister Wever tambe a enfatisa cu e vision di Henny Eman a bai mas leu cu e aspecto economico, pero a enfoca riba un sociedad mas husto y igual. Den e contexto aki, a menciona desaroyonan importante manera e introduccion di AZV y acceso universal na cuido medico, cual a contribui significativamente na bienestar di pueblo di Aruba.
Segun Minister Wever, e decisionnan y maneho implementa den e periodo di Henny Eman a contribui na e fundeshi socio-economico cu Aruba ta sigui beneficia di dje te dia di awe.
Den su palabra final, Minister Wever a resalta simbolismo di e stampia conmemorativo, indicando cu cada stampia ta conta un historia y ta refleha e identidad di nos pais. Cu e iniciativa aki, Aruba ta honra e contribucion di un lider cu su vision, perseverancia y compromiso a hunga un rol fundamental den formacion di e Aruba moderno cu nos conoce awe.
Finalmente, Minister Wever a gradici PostAruba N.V. pa e iniciativa y a felicita nan pa e bon trabou y cu e realisacion di e stampia conmemorativo aki, cual ta un digno reconocimiento di e legado di Henny Eman.
