E celebracion di 50 aña di nos Himno y Bandera y 40 aña di Status Aparte tabata un oportunidad unico pa honra nos historia y unifica nos pueblo. Pero en bes di unidad, hopi hende a keda cu un sabor amargo.
Tin un percepcion cla cu Mike Eman a dirigi e celebracionnan den un direccion selectivo. Ela concentra tur celebracion riba un solo famia, su famia, mientras cu e rol fundamental di Betico Croes a wordo minimisa of ignora.
Pa hopi Arubiano, esaki no ta solamente un olvido, pero un decision consciente. Un decision cu ta duna e impresion cu Mike Eman kier a pone enfasis solamente riba su propio legado familiar, en bes di honra tambe e persona cu, segun historia, a lidera e lucha pa Status Aparte y a pone e base pa nos identidad nacional.
E peligro di esaki ta grandi. Ora historia wordo presenta selectivamente, e no ta crea solamente division, pero tambe ta manda un mensahe peligroso, cu memoria di un pueblo por wordo forma segun preferencia politico of personal.
Dios Gracia cu pueblo di Aruba no ta lubida. Historia di Betico Croes no por wordo gestuf ni skirbi di nobo. Su contribucion ta graba den e conciencia colectivo di nos pueblo.
Si Eman berdaderamente kier a honra 50 aña di nos simbolonan nacional y 40 aña di nos Status Aparte, e mester a haci esaki cu honestidad. No cu silencio selectivo, ni cu agenda personal, pero cu respet pa tur esnan cu a contribui, specialmente pa Betico Croes cu a paga e prijs di mas halto pa e libertad y identidad cu nos tin awe.
Un celebracion sin e berdad ta un simpel spetakel. Pueblo di Aruba merece mas cu un spetakel lidera pa Mike Eman. Aruba su historia merece respet.
