Ta facil pa como parlamentario den oposicion reclama den supermercado cu tur cos ta mas caro, cu prijs di webo, prijs di potham y prijs di bleki di soseishi a subi, pero vota contra presupuesto 2026 cu ta mehora poder di compra pa nos conciudadonan ta un contradiccion total,” Sr. Hart ta enfatisa.
Cu hopi asombro Parlamentario Hart a tuma nota riba rednan social di un comentario cu su colega Parlamentario Dangui Oduber a skirbi, y ta bisa textualmente: “Un cos ta sigur, e gobierno aki den 11 luna no a haci NADA, NADA NADA. Nan ta cla pa bay cas!” Lesando esaki parlamentario Hart ta puntra su mes cu ki cuer’i cara Parlamentario Dangui Oduber ta trece e barbaridad aki.
“Laga mi recorda Sr. Oduber cu riba e mesun dia cu e gobierno nobo a wordo huramenta, 28 di maart 2025, via un nota di cambio a duna bek di biaha na comunidad. Cu aprobacion di e nota di cambio a hisa e suma di Reparatietoeslag pa 21 mil pensionado cu 250 florin extra tur luna desde 1 di mei 2025 y a baha e accijnzen riba gasolin y diesel pa tur usuario cu 10 cent tambe desde 1 di mei 2025“ sr. Hart a enfatisa.
E nota di cambio aki tabata nesecario paso MEP no tabatin esaki den e presupuesto 2025 y mester conclui cu no tabatin prioridad pa mehora poder di compra. Cu e aprobacion di presupuesto 2026 tur pensionado a bolbe ricibi un otro aumento tur luna, a ehecuta e aumento salarial pa maestronan y mehoracion di e posicion salarial di profesionalnan di gobierno.
Cu e implementacion di e aumento den AOV combina cu e reparatietoeslag, e total di pensioen pa pensionadonan ta subi di manera significativo. E aumento ta nifica concretamente cu pensioen pa soltero a subi cu AWG 500 pa luna, pensioen pa pareha a subi cu AWG 900 pa luna y pensioen pa pareha parti a subi cu AWG 485 pa luna. Esaki ta un mehoracion di poder di compra pa duna nos grandinan mas siguridad, mas dignidad, mas paz y trankilidad.
Esaki no ta un gesto simbolico; e ta un acto di husticia, un reparacion moral pa daño causa. Pa cu esaki, parlamentario Dangui Oduber a vota contra tambe. Sr. Hart kier a refresca memoria di colega Parlamentario Sr. Dangui Oduber cu sigur e gabinete AVP-FUTURO a y ta logrando cosnan bon pa pueblo durante e corto periodo cu a asumi gobernacion, pero sigur cu ainda falta hopi mas, por ehemplo riba proteccion di consumidornan.
Riba 15 di maart 2026, por ehempel, e “Landsverordening Bestuursrechterlijke Handhaving Consumentenbescherming” a drenta na vigor, un ley cu a wordo aproba durante Gabinete AVP-FUTURO. E ley aki lo fortifica di manera significativo e proteccion di consumidor y ta duna Aruba Fair Trade Authority (AFTA) un rol importante den supervision y aplicacion di e ley pa proteha derechonan di consumidor. Den 2026 consumidornan di Aruba lo por entrega keho na un portal digital (consuloket).
“Ta importante pa percura pa no solamente mehoracion di poder di compra, pero tambe proteccion di consumidornan na Aruba. E canasta basico ta un instrumento importante pa sigui duna proteccion na consumidornan. Mester garantiza cu ora un consumidor cumpra un producto den e canasta basico e consumidor ta paga e prijs manera stipula pa ley. P’esey mi ta contento di por wordo informa cu Minister di Finansa, Asunto Economico y Sector Primario di Aruba, Sr. Wever ta tumando pasonan concreto den su maneho pa pone mas atencion na implementacion di boet y sancion pa asina fortifica control di prijs di productonan di prome necesidad,” Sr. Hart a indica.
Desde november 2021 a trece e cambio necesario den e ‘Prijzenverordening,” pero ainda esaki no a drenta na vigor. Actualmente ta trahando riba un Landsbesluit Bestuurlijke Handhaving Prijzenverordening, cu ta na caminda pa Raad van Advies pa conseho. “Paso pa paso ta trahando concreto riba leynan y maneho pa mehora e poder di compra y proteccion di e consumidor” Sr. Hart a enfatisa.
