Hende kier pone masha condicion ora nan tin cu pordona otro, por ehempel:
Mi ta pordona, pero mi no ta lubida.
Mi ta pordona pero no lage pasa banda di mi.
Mi ta pordona pero e no ta hanja nada mas serca mi.
Mi ta pordona pero mi no kier sigi biba hunto cune.
Mi ta pordona pero no lage , ni pasa banda mi entiero.
Mi ta pordona pero lage lubida cu e ta mi famia.
Mi ta pordona, pero e cos cu e haci esey e por bien lubida , cu nos ta ruman.
Y esun di mas fuerte ta hende cu ta pratica falta di pordon , manera nan nunca a haci fout.
Corda riba Colosensenan 3:12-14.
Pero palabra di Dios ta bisa cu si nos no pordona, nos ruman Dios tampoco ta pordona nos ( Mateo 6:14-15) Cual ta un condicion hopi serio, cual Dios ta pone pa nos, y cu nos mester respeta, pasobra falta di pordon tin hopi consecuencia doloroso.
Pero abo a yega di pensa con Dios su condicion ta cu nos. ora Dios ta pordona nos?.
Den Jeremeias 31:34 ta para scirbi: Pasobra lo Mi pordona nan inikidad, y nan pica lo Mi no corda mas.
Wak e diferencia entre Dios y hende y corda cu e palabra di Dios ta bisa cu nos mester ta imitadornan di Cristo Hesus, kende a muri na crus pa nos picanan wordo pordona.
Isaias 43:25 ta para scirbi: Ami si, Ami ta esun cu ta kita bo transgreshonnan pa Mi mes causa, y lo mi no corda bo picanan.
Tene cuenta cu ora Dios pordona nos , nos picanan nos ta keda liber, y Dios nunca lo bin tira nos cuenta bieu bek den nos cara.
Hebreonan 8:12 ta para scirbi; Pasobra lo Mi tin misericordia di nan inikidadnan, y lo mi no corda nan picanan mas.
Danki na Dios pa su eterno misericordia, cu nos por keda libra di pica, y asina e diabel no tin caminda di gara den nos bida.
Pesey e palabra di Dios ta bisa den Isaias 43:18-19, pa nos no corda riba cosnan cu e pasa caba, pero mira cu Dios ta bay haci cosnan nobo. Awendia nos por nota con berdadero e palabra di Dios ta, pasobra biba cu cosnan di pasado riba nos consenshi ta haci nos malo, ta trece stress, amargura, depresion, y ta afecta nos salud mental.
Hebreonan 10:17 ta bisa lo siguiente: Y nan picanan y nan inhusticia lo Mi no corda mas.
Esey ta pa tur hende sa cu no tin di ofrece ningun sacrificio pa pica pasobra Cristo Hesus su sacrifisio ta un biaha y pa semper.
Tin hopi hende cu ta malo, amarga, den situacion dificil pasobra, nan no kier pordona, ni tampoco laga los for di pasado, tin hopi hende ta biba den scuridad, pasobra nan no sa con sali for di pica of nan ta rechasa e unico forma pa sali for di pica.
Ta para scirbi den 1 Juan 1 :9 y esaki ta conta pa tur hende, bisando: Si nos confesa nos picanan E ta fiel y husto pa pordona nos no picanan y pa limpia nos di tur inhusticia.
Prome cu nos reconcilia cu Dios, mester bini confesion na Dios, y arepentimento, pa asina nos bida ta keda den bon relacion cu Dios, pasobra sin confecion y sin arepentimento no tin pordon di pica.
Awendia tin hende cu no kier pordona y reconoce e Soberabia di Dios den nan bida, y nan ta sigi biba den scuridad manera nan kier pensando cu nan por ganja Dios.
Sinceramente, Pastor Marcel Balootje
