Stima otro, bendiciona otro, respeta otro, trata otro bon, no paga malo cu malo, pordona otro,no insulta otro, trata otro cu carinjo, no menosprecia otro, demostra amor den tur cos pasobra amor ta bini di Dios.
Un bon trato ta manera un bon fruta, cu ta smaak dushi,y ta pone bo bolbe bek, caminda bo ta wordo bon trata y bon sirbi.
Dios semper a trata nos bon, ningun hende por a hanja maltrato for di Dios, pasobra un biaha mas nos ta bisa cu henter nos curason cu Dios ta amor.
Josue 22:5 ta bisa : Solamente tene hopi cuidao, pa cumpli cu e mandamento, y e ley cu Moises,e sirbido di Senjor a ordena boso , di stima Senjor boso Dios y cana den tur su camindanan,y warda Su mandamentonan,y tene duro na dj’E y sirbi’E cu henter boso curason y cu henter boso alma.
Stimanan laga nos stima otro,pasobra amor ta bini di Dios,y tur cu ta stima ta naci di Dios, y conoce Dios.Esun cu no ta stima no conoce Dios. Pasobra Dios ta amor.( 1 Juan 4:7-8).
Si nos wak rond den mundo cuanto maldad y inmoralidad, nos ta puntra na unda e amor di Dios a keda, ta con hende por a aparta asina tanto for di Dios, con e amor di hende pa Dios por a fria asina tanto.
Ta di berdad hende a bira cu nan ta wak nan propio interes solamente y hopi no tin tempo pa Dios.
Amor no conoce miedo,ma amor perfecto ta corre cu miedo,pasobra miedo tin di haci cu castigo,y esun cu tin miedo no a wordo haci perfecto den amor.( 1 Juan 4:18).
Nos ta stima pasobra E a stima nos prome: Si un hende bisa, Mi ta stima Dios,y ta odia su ruman e ta un ganjado,pasobra esun cu no ta stima su ruman cu e a mira, no por stima Dios, Kende a no a mira.( 1 Juan 4:19-20).
Nos sa cu nos a pasa di morto pa bida,pasobra nos ta stima e rumannan,Esun cu no ta stima ta permanece den morto.Ken cu ta odia su ruman, ta un matado, y nos tur sa cu ningun matado tin bida eterno ta permanece den dje.( 1 Juan 3:15).
Amor y fieldad ta cana hunto den un matrimonio, cada homber mester mantene nan mes fiel na nan esposa, y cada muher mester mantene su mes fiel na nan esposo.
Na e midi cu adulterio y inmoralidad a lanta e ta spantoso, pasobra e ta kibra un comunidad cu Divorcio , debilita bida social, pasobra ora un famia kibra semper e yuinan ta pasa den scual y trauma, pasobra nan bida no ta mescos, locual nan tabata orguyoso di dje, locual tabata un bon ehempel pa nan, e hendenan cu tabata nan heroe awe ta ninga, rechasa otro y no kier tende nada di otro.
Pesey cada homber cu por mantene su mes fiel den matrimonio ta un persona di gran balor , mescos cu cada muher cu por mantene su mes fiel den un matrimonio ta un persona di gran balor.
Nos fieldad y nos integridad , ta demostra un karakter solido cu nos yuinan lo imita.
Pasobra cada mayor ta un role model den famia, ta bon pa mayornan tene bon cuenta cu esey.
Ora nos ta soporta otro , y pordona otro nos ta demostra cu nos ta yuinan di Dios. Pasobra Dios a pordona nos y E a no ta corda riba nos picanan.( Hebreonan 8:12).
Awor mas cu nunca laga amor briya for di nos curason, pa e mundo por sa cu nos yiu di Dios.
Sinceramente, Pastor Marcel Balootje
