Ayera, hunto cu e delegacion di Aruba Sr. Chito Paris y Sra. Emiliënne Kelly di Directie Financiën, Minister di Finansa, Asunto Economico y Sector Primario, Sr. Geoffrey Wever, a tuma luga e prome ronda di reunionnan financiero na New York.
E delegacion di Aruba a wordo ricibi pa Citi, cu un ekipo lidera pa Sr. Dustin Ling, un profesional Arubiano cu pa varios aña ta trahando na Citi den New York. E encuentro aki no solamente a ofrece un plataforma pa discusionnan financiero di alto nivel, pero tambe a marca un momento di orguyo pa Aruba, pa mira talento local contribuyendo activamente den institucionnan global.
Durante e reunion, delegacion a comparti un update amplio riba situacion economico y financiero di Aruba, incluyendo e trayecto di refinanciamento di debe nacional cu ta planifica pa 2026. E enfoke principal tawata riba posicion di Aruba den mercado di capital, serca un grupo di inversionista nobo. Aruba ta conoci caba serca varios inversionista Americano pero e meta principal di e mission aki tawata pa amplia e base di inversionista pa asina fortifica e posicion di Aruba riba mercado internacional di capital.
E prome dia di reunionnan por wordo considera como exitoso y productivo, cu discusionnan profundo riba oportunidadnan pa fortalece relacionnan internacional y amplia e red di inversionistanan cu Aruba por colabora cu nan. E dialogo aki ta forma un parti esencial di e strategia pa diversifica acceso na financiamiento, mientras cu Aruba ta sigui cumpli cu su obligacionnan existente cu inversionistanan internacional.
Diamars e delegacion di Aruba a continua cu e siguiente fase di e trayecto, cu un biahe pa London pa sigi e segunda parti di e reunionnan cu inversionistanan Europeo. E encuentro nan aki lo sigui enfoca riba mesun meta strategico: asegura financiamiento responsabel, fortalece relacionnan internacional, y crea mas oportunidad pa Aruba den mercado di capital.
Cu e esfuerso aki, Gabinete AVP-Futoro ta reafirma su compromiso pa un maneho financiero responsabel y pa tuma decisionnan concreto pa bienestar di Aruba, tanto pa presente como pa futuro.
