Hopi hende ta kere cu e Rijkswet HOFA ta djis un “version nobo” di e supervision cu nos tin caba (LAft), of cu e ta bay djis pa baha nos debe. Pero e berdad ta hopi mas peligroso: HOFA ta un sistema diseña pa Aruba no sali nunca mas for di e gara di Hulanda.
1. Supervision caba NO ta un motibo pa HOFA
Gobierno ta bisa cu nos tin supervision caba, anto “kico ta e diferencia?”. E diferencia ta enorme:
LAft (Ley di Aruba): E ta un ley di nos mes. Nos Parlamento por dicidi di cambie of stop e si nos no ta di acuerdo mas.
HOFA (Rijkswet): Unabes e drenta na vigor, Aruba ta perde e yabi. Pa kita e ley aki den futuro, bo mester di aprobacion di e Tweede Kamer na Hulanda. Aruba no por sali su so mas; nos ta bira dependiente di boluntad di Politiconan na Den Haag pa haya nos libertad bek.
2. Debe bao di 50%? Esey no ta salba nos!
Nan ta gañabo cu ora nos debe baha, e supervision ta stop. E acuerdo ta bisa otro cos:
E meta principal ta “houdbare overheidsfinanciën” (finansa sostenibel), pero e condicionnan pa sali ta mara na un lista di 20 punto di secuestro.
Incluso si nos debe ta bao di 50%, Hulanda por bisa cu bo “financieel beheer” (maneho financiero) no ta sufisiente bon ainda of cu nan no tin “voldoende grip” riba e sector colectivo (manera AZV y SVB). Nan por tene nos den e ley aki pa decadanan largo pa “siguridad” of just pa capricho.
3. E secuestro di e “Collectieve Sector”
Esaki ta e parti mas preocupante den e acuerdo:
E ley no ta conta pa Gobierno so, sino pa e sector colectivo completo.
Esaki ta nifica cu Hulanda por mete den presupuesto di AZV, SVB, y fundacionnan, y te hasta den e maneho di nos NV-nan di utilidad, manera SETAR, WEB, ELMAR, RDA, COMPANIA DI PETROLEO ARUBANO, si nan haya cu e ta afecta e meta di e ley.
Nan ta uza e interes abao como un “sales pitch”. Pero e prijs cu bo ta paga ta cu bo ta entrega e yabi di bo cas pa semper.
Finalmente: un caminda sin retorno
Accepta HOFA no ta “pone ordo”, e ta nifica entrega bo Status Aparte. Unabes bo drenta den un Rijkswet, bo a drenta den un prizon legal unda Hulanda tin e yabi y nan no tin ningun obligacion di duna bo e bek, no importa con bon bo comporta bo mes.
Pueblo, no laga nan gaña bo cu “debe” o “supervision”. Esaki ta trata di PODER. Ken bo kier pa dicidi riba bo salud y bo placa. Pa hisa salario, duna indexering, of hisa pensioen, ta Den Haag ta dicidi of tin ultimo palabra: Ken bo kier pa dicidi pabo? Abo aki na Aruba, of un ambtenaar na Den Haag?
