Minister di Finansa, Asunto Economico y Sector Primario, mr. Geoffrey Wever, a tene su reunion trimestral cu dos miembro di directiva di Camera di Comercio (KVK), Presidente Sr. Diederik Kemmerling y Vice-presidente Sr. Robert Croes. Durante e reunion siman pasa, a trata varios topico relevante pa sector priva, cu enfoke riba desaroyo economico, cost of doing business y fortalecemento di e posicion di Aruba den comercio internacional.
Un di e puntonan importante tawata e situacion geopolitico actual, incluyendo e tension entre Merca, Israel y Iran, y e posible impacto global riba prijs di petroleo y costo di bida. KVK a expresa nan preocupacion tocante e efecto cu esaki lo por tin pa Aruba.
Minister Wever a indica cu Gobierno ta monitoreando e desaroyonan di cerca y ta trahando riba diferente instrumentonan pa mitiga impacto economico si esaki materialisa su mes, teniendo na cuenta e limitacionnan financiero existente.
Ademas, a dialoga tocante oportunidadnan pa amplia actividad comercial den region, incluyendo exploracion di relacionnan economico cu Venezuela. Den e contexto aki, a papia di e posibilidad pa organiza un “handelsmissie”, cu lo contribui na crea conexionnan directo y explora oportunidadnan concreto.
Tambe a discuti e necesidad pa explora e posibilidad di rutanan logistico alternativo, incluyendo opcionnan via Colombia y Panama, como parti di un strategia mas amplio pa diversifica cadena di logistica y aumenta resiliencia económico, cu ya Minster Wever ta trahando riba dje.
Den e reunion, KVK tambe a pidi update riba e proceso di revitalisacion di Oranjestad. Minister Wever a indica cu e proceso ta avansando bon, cu mas actividad economico visibel, interes di inversionistanan y un aumento den registracion di interes di negoshinan potencial nobo, incluyendo actividad den Free Zone, cu ta mustra un movimiento positivo den e area di inversion.
Tambe a toca e bishita di International Monetary Fund (IMF), unda despues di reunion cu Gobierno, e delegacion lo sostene dialogo cu stakeholdernan importante, incluyendo KVK. E reunionnan aki tin como meta pa haya un miho comprension di situacion economico y financiero local, como parti di IMF su mission tecnico exploratorio cu ta consisti di un exploracion e posibilidad di introduccion di BTW como alternativa pa BBO.
Minister Wever a enfatisa importancia di cooperacion continuo cu sector priva y e rol clave di organizacionnan manera KVK den contribui na e dialogo economico nacional.
Minister Wever ta gradici Sr. Kemmerling, Sr. Croes y KVK pa e dialogo constructivo y nan compromisoy trabou continuo pa contribui na desaroyo di e sector priva y e economia di Aruba.
