Proximo diasabra dia 28 di maart, miyones di hende, gobiernonan y empresanan lo paga luz pa un ora largo durante Earth Hour. Riba e islanan lo paga luz tambe di 8:30 pa 9:30 di anochi na diferente localidad pa pidi atencion pa naturalesa.
Impacto global
Earth Hour a cuminsa como iniciativa di WWF (World Wide Fund for Nature) y a crece como e movemento mundial di mas grandi pa proteccion di naturalesa. E aña aki ta celebra 20 aña di Earth Hour y e islanan Caribense tambe ta participa. Cu cooperacion di Curacao Ports Authority y Aqualectra, e area rond di Brionplein, Pontjesbrug, Handelskade y Gouverneurspaleis lo ta scuri.
Na Boneiro, e Entidad Publico Boneiro y WEB Bonaire a uni forsa pa paga e luznan di e cayanan den area di Wilhelminaplein, partinan di Kaya Grandi y Kaya N.E. Craane. Ademas, Tourism Corporation Bonaire, Elmar N.V. y Directie Milieu en Natuur na Aruba, y Entidad Publico na Saba lo paga e luz di nan edificio. Port St. Maarten lo desconecta e luznan no-esencial di e brug di Causeway.
Mas cu paga luz
WWF ta invita e comunidad y otro empresanan tambe pa participa na Earth Hour. Paga luz ta un simbolo pa pidi atencion pa naturalesa. Pero e participacion por bay mas leu cu e ora. Ta posible pa haci algo positivo na bienestar di nos mundo. Esaki por ta por ehempel: uza awa mas eficiente, come mas cuminda vegetariano/vegan, recicla, planta mata, of join un ‘clean up’.
Islanan mas vulnerable
E participacion di e islanan Caribense na Earth Hour ta mustra e dedicacion pa pone atencion na e consecuencianan di cambio di clima cu nos ta sinti mas y mas cada dia. Islanan chikito ta extra vulnerable pa cambio di clima. Debi na subida di nivel di lama y e mundo cu ta calentando, e chance pa tempo extremo manera secura extremo, inundacionnan pisa y horcan, ta hopi grandi. Esaki tin un impacto grandi riba economia di e islanan, bienestar y prosperidad di e poblacion. Pesey, pa e motibo aki, ta importante pa nos para hunto, reflecta riba nos impacto y haci pasonan chikito den direccion di un futuro mas sostenibel.
