Recientemente, Fraccion di MEP a ricibi contestacion di 13 pregunta parlamentario cu e fraccion a haci 4 luna pasa na e minister relaciona cu un biahe di trabou cu el a haci pa Hulanda. E preguntanan tabata pa Parlamento wordo informa di e motibo di e biahe, cu ken el a reuni, kico a logra durante e biahe y cuanto e gastonan di e biahe tabata. Esakinan ta preguntanan standard cu fraccion di MEP den Parlamento ta haci na tur minister despues di cada biahe.
Tin minister, por ehempel Minister Geoffrey Wever, ta contesta extensamente. Tin minister cu nunca ta contesta, manera Minister Baba Herde y Mike Eman. Y tin minister cu ta haci burla cu Parlamento, manera Minister Gerlien Croes.
Di e 13 pregunta, solamente un a wordo contesta realmente: e prome pregunta, kico tabata e motibo di e biahe. E contestacion tabata simpel: pa atende reunion di Rijksministerraad. Pa tur e otro pregunta, e contestacion tabata simplemente “mira pregunta 1” siendo cu pregunta 1 no ta duna tur e informacion, ni tampoco el’a manda documentonan adicional cu mas informacion. Esaki no por wordo considera como contestacion serio ni completo. Si un alumno na scol contesta “mira pregunta 1” pa tur demas preguntanan riba un examen, e ta haya mal punto. Si un trahado contesta su donjo di trabou asina, en bes di duna cuenta di su biahe di trabou cu e donjo di trabou a paga p’e, e ta perde su trabou. Pero minister Gerlien Croes ta pretende cu e si por contesta di e forma aki, y pretende cu el’a cumpli.
E funcion di Parlamento ta pa controla gobierno. E sistema democratico ta traha asina: pueblo ta eligi Parlamento, y Parlamento ta controla e ministernan. Esaki ta nifica cu e ministernan no ta manda riba Parlamento; Parlamento ta e autoridad democratico na cual gobierno mester duna cuenta. Pa e motibo aki fraccion di MEP a manda un carta fuerte bek pa e minister, pa e contesta e preguntanan manera nos Constitucion ta prescribi.
Ora un minister no contesta pregunta parlamentario completamente, e no ta solamente evita contesta un parlamentario, pero e ta evita transparencia pa cu pueblo di Aruba. Duna informacion na Parlamento no ta un fabor cu un minister ta haci; e ta un obligacion democratico y constitucional.
Transparencia no ta opcion. No ta algo cu un minister por scoge ora e kier. Transparencia ta un obligacion cu ta bin cu e puesto di minister. Sin transparencia, no por tin control. Sin control, no por tin confianza.
Y sin confianza di pueblo, ningun gobierno no por funciona.
