Fraccion di Movimiento Electoral di Pueblo (MEP) den Parlamento a haci pregunta na e minister encarga cu energia tocante e recien nombracion di un director nobo na Water- en Energiebedrijf Aruba (WEB).
Den e preguntanan, e fraccion ta pidi clarificacion si e nombracion a tuma luga conforme e reglanan di good corporate governance cu ta aplicabel pa companianan di gobierno. Segun e principionan aki, posicionnan di e nivel aki mester wordo habri pa un procedura di solicitacion habri y publico, pa asina garantisa transparencia, igualdad di oportunidad y seleccion di e candidato cu e miho cualificacionnan.
Fraccion di MEP ta considera cu e reglanan di good corporate governance ta hopi importante, pasobra nan ta garantisa un maneho transparente y responsabel di companianan publico. Companianan manera WEB ta pertenece na comunidad di Aruba, y pa e motibo ey e proceduranan di nombramento mester ta cla, transparente y basa riba cualificacion y merito.
Cu e preguntanan na e minister, e fraccion ta busca pa haya claridad si a sigui e procedura corecto di solicitacion habri, ki tempo esaki a tuma luga, cua tabata e exigencianan di e funcion, y cuanto otro candidato a aplica pa e posicion.
MEP ta enfatisa cu mester respeta e principionan di good corporate governance, pasobra esaki ta esencial pa mantene confianza di pueblo den gobierno y den maneho di companianan publico. Transparencia y bon gobernacion ta keda puntanan central pa un gobernacion responsabel.
