Awendia nos tin di wak bon, tende bon, scucha bon, no ta tur cos bo por corre bisa si pa complace cu hende, pasobra maldad ta bini lora den papel di regalo.
Cada dia e forsa maligno ta inventa cosnan nobo, pa troce e berdad di Dios, y purba tumba yuinan di Dios.
Ta tempo pa wak bon nos amistadnan, y evita di cana cu hende cu constant ta den problema, pa asina bo no hanja bo den problema, huy for di hende cu no tin temor di Dios y cu no tin respet pa ley.
Wanta duro na e berdad di Dios, aunke hende por hari bo . Of chercha bo, bisa cu bo ta kens . Of bo ta manera hende bieu, pero esey no ta nada, si bo tin cu perde un amistad di hende, lage bay , keda cu Dios, pasobra bo salbacion no ta depende di hende, pasobra ningun hende no a muri na crus pa bo, pero ta Cristo Hesus a hacie.
Inmoralidad a aumenta, ofertanan baho, ta wordo haci tur caminda, pa bo wordo getest, y asina intenta contra bo integridad y bo firmesa den Senjor, pero nos tin cu corda tur dia y tur momento con Hesus a reprende e diabel den Mateo 4:1-11.
Huy for di inmoralidad, haci manera Hose den e buki di Genesis 39:11-12, pasobra ta mihor bo huy cu bo pone Dios su cara na berguensa, y perde bo integridad.Corda bon cu pica no ta cos di chansa cune.
No laga ningun hende hunga sabi riba bo, no pretende riba cosnan cu no ta den boluntad di Dios, no sea envidioso riba nada di otro hende, corda cu locual Dios tin pa bo, ta pa bo e ta , y ningun hende por kite for di bo.
Ora bo ta hoben, tanto mucha muher como mucha homber, evita di tur manera di tin relacion cu hende casa, corre duro, kibra amistad, no wordo tenta door di placa, ni tampoco propiedad, pasobra nada di esey no ta hustifica pa bo cay den pica y bira catibo di hende.
Un cos mas cu ta parce cu tin hoben ta hiba pensamentonan di antanjo of ideanan di internet, cu mester cana cu arma, pasobra nan bida ta na peliger, pasobra tin hende ta wak nan, of asina nan ta sinti nan mes mas homber, awel tin un berdad cu ta para scirbi den Salmo 127:1 y cu hende tin cu comprende bon cu si Dios no cuida envano hende por cuida, asina ta cu bo bida ta den man di Dios y Dios ta cuida di bo, pero abo como persona mester abstene for di tur clase di maldad.
Nunca tenta Dios y hinca bo curpa den problema, pasobra esey ta locual e diabel kier, pa abo ta den problema y bo famia ta den tristesa, pasobra bo horea ta duro y bo no kier palabra di Dios, y tampoco bo ta respeta conseho di bo mayornan.
Nos no ta bibando den bon tempo, y esey tur hende sa, tur locual ta para scirbi, lo cumpli prome cu e binida di Cristo Hesus, ningun hende sa e dia y e ora di Su binida, esey ta nifica cu tur esnan cu kier forsa cos, pone fecha, anja, y dia, ta hende nan cu ta busca fama pa nan mes,pero un berdad tey cu nos tur mester ta prepara pasobra Cristo ta bini na e momento cu ningun lo hende sa.
Abstene di tur clase di maldad, percura di stima otro, tene duro na e Palabra di Dios, y sea fiel.
Sinceramente,Pastor Marcel Balootje
