Diabierna, e Comision di Evaluacion a presenta formalmente e informe final di e evaluacion intermedio di e ‘Onderlinge Regeling Samenwerking bij Hervormingen’ (ORSH), hunto cu e demas rapportnan di investigacion, na Prome Minister, sr. mr. Mike Eman, y na Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes.
E comicion di evaluacion a wordo estableci abase di un decision conhunto dia 22 di september 2025 pa e paisnan involucra den Reino, cu como tarea pa prepara un informe independiente riba e funcionamento di e cooperacion den reforma.
E evaluacion ta cubri e cooperacion entre Aruba, Corsou, Sint Maarten y Hulanda desde 2020, cu enfoke riba fortalecemento di e resiliencia economico y e capacidad gubernamental di e paisnan den Reino.
For di e evaluacion ta resulta cu e cooperacion durante e ultimo añanan a produci lasonan importante. Reforma nan a cuminsa, e cooperacion a wordo fortaleci y a incorpora capacidad adicional di expertonan y implementacion via e ‘Tijdelijke Werkorganisatie’ (TWO). Na mes momento, a constata cu hopi trayecto ainda ta den fase di implementacion y cu ta necesario mas esfuerso pa logra consolida e resultadonan di forma duradero.
E evaluacion tambe ta enfatisa cu e paisnan ta keda primeramente responsabel pa nan propio desaroyo y reforma nan. E cooperacion den Reino mester wordo mira como un instrumento pa fortalece autonomia, entre otro door di amplia capacidad di implementacion, comparticion di conocemento y desaroyo institucional.
Ademas, e evaluacion ta subraya e importancia di continua cu e cooperacion y ta ofrece punto concreto pa e siguiente fase. E enfoke aki ta riba priorisacion mas concreto, fortalecemento di capacidad di implementacion y un acercamento dirigi pa realisa reforma nan di manera efectivo.
Gobierno di Aruba ta acoge e resultadonan di e comision di evaluacion y ta considera esaki como un base valioso pa, hunto cu partnernan den Reino, sigui construi riba reforma nan sostenibel. Den periodo binidero, hunto cu e partidonan involucra, lo traha riba e elaboracion adicional di e recomendacionnan.
Cu e evaluacion aki, a tuma un paso importante pa un siguiente fase di cooperacion, unda enfoke, implementacion y responsabilidad comparti ta central, cu como meta un economia resiliente y un gobierno fuerte pa Aruba. E informe final lo wordo presenta na representantenan di pueblo di tur pais rond 2 di april.
