Despues cu Moises a tende di Senjor cu e lo no hiba e pueblo pa crusa Jordan y drenta e tera priminti , pa motibo di desobediencia.( Numbernan 20:9-12). Moises a haci lo siguiente: Y e ora ey Moises a papia cu Senjor bisando: Cu Senjor e Dios di e spiritunan di tur carni, nombra un homber riba e congreacion. Kende lo sali y drenta nan dilanti,y lo saca nan y trece nan bek aden , pa e pueblo no keda manera carne cu no tin wardado.
Y Senjor a bisa Moises, Tuma Josue yiu homber di Nun, un homber cu tin e Spirito den dje, y pone bo man riba dje.( Numbernan 27:15-18).
Den un palabra bisa , Senjor ta bisa Moises pa duna Josue responsabilidad, pasobra hopi hende kier un titulo di liderasgo, pero nan no kier responsabilidad, nan ta gusta sinta manda aki, y manda aya, cu boshi di sirbido, pero nan mes no ta tuma e responsabilidad. Y dilanti di Dios responsabilidad ta conta hopi, pasobra ta den esey un hende su karakter ta wordo forma.
Ora Dios yama un persona, prome cos cu E ta traha riba dje ta e persona su responsabilidad, Senjor no ta importa con netji bo ta bisti ni tampoco, con grandi bo auto ta, ni tampoco e grandura di bo iglesia, Dios ta wak responsabilidad hopi serio, pasobra den esey nos obediencia na Dios ta sinta.
Den bista di Dios, responsabilidad ta cuminsa ora nos ta na tempo, yega na tempo, ta demostra cu nos ta humilde , obediente, y tin respet pa Dios, pasobra yamada y trabao den Senjor e no ta un show, ta algo serio Dios ta pone den nos man pa nos ta obediente y responsabel.
Rey Saul tabatin tur cos , e tabata un guy di bon tipo, pero e no tabata responsabel, pasobra ora Dios a mande bay destrui e Amalekitanan, e no tabata obediente, na e palabra di Dios, y mayoria biaha hende cu no ta obediente y humilde no ta responsabel.
Rey David a pone Dios su rabia lanta, pasobra e no actua responsabel como rey , palabra di Dios ta bisa cu e a pone e enemigonan di Dios hanja oportunidad pa blasfema.( 2 Samuel 12:14).
Si nos mira bon awendia, adulterio ta un hecho iresponsabel, tanto dilanti di Dios, como dilanti di hende, pasobra e ta falta di respet y temor pa Dios, y e ta un hecho di traicion, pasobra e confiansa di e unidad entre Dios, e homber y e muher ta wordo kibra. Pasobra matrimonio ta un cabuya di tres cuerde, E Homber, E muher, y Dios.
Tene cuenta cu esun cu comete adulterio a defrauda e famia, especialmente si e pareha tin yiu, pasobra yuinan ta esnan cu ta sinti mas dolor ora nan mayornan separa.
Tempo mi tabata mucha mi tabata papia manera un mucha, pensa manera mucha,rasona manera mucha,ma awor cu mi a bira homber, mi a pone cos di mucha un banda.
Den tur situacion den nos bida, ta yega e momento di bira responsabel, y usa nos dominio propio y no laga cosnan di mundo domina nos, y biba manera hende cu no tin Dios, y cu no tin direccion, y no kier carga responsabilidad.
Nos tin un responsabilidad grandi cu Dios, cual ta e gran comision, cual ta di hiba Su palabra tur caminda, manera Cristo Hesus a bisa bay den henter mundo y predica Su palabra.
Y mas obediente nos ta, mas responsabel nos ta , mas humilde nos ta mas lihe nos ta crece, pasobra Dios ta stima hende humilde.
Dios ta stima hende responsabel.
Sinceramente, Pastor Marcel Balootje
