ORANJESTAD – E reciente concierto organisa den pleno temporada halto (high season) a genera hopi comentario den comunidad. Mas aya di e ambiente festivo y presentacion di artistanan, e evento a habri un espacio pa un analisis profundo riba e decisionnan strategico, e transparencia den maneho di fondo publico y e impacto real riba e economia di Aruba.
E discusion principal no ta bay riba e calidad artistico, sino riba e vision tras di e proyecto y e retorno cu esaki mester a genera pa Aruba como destino turistico.
E strategia tras di e momentum (Timing)
Organisa un evento di gran escala den un periodo caminda ocupacion hotelero ya caba ta na su maximo capacidad, ta lanta pregunta legitimo. Normalmente, inversionnan den mercadeo turistico ta wordo uza pa stimula demanda den temporada abou den luna di Mei of September.
Den e contexto aki, e pregunta central ta: Kico ta e balor agrega di un inversion asina’ki den high season? Si e hotelnan ta yen caba, mester evalua si e gasto aki a genera bishitantenan nobo of si simplemente a subsidia entretenimento pa studiante of publico local of tabatin otro meta.
Falta di transparencia y scrutinio publico
Un punto critico den e debate ta e falta di claridad den e proceso di aprobacion y ehecucion. Pa garantisa confianza den e maneho di fondonan di comunidad, ta esencial pa tin contesta riba e siguiente puntonan:
Responsabilidad: Cual compania tabata encarga cu e organisacion y kico ta nan trayectoria den eventonan di e magnitud aki? Cuanto evento e compania aki a organisa den pasado?
Seleccion: Con e seleccion di e organisadonan a tuma luga y abou di ki criterio di transparencia?
Presupuesto: Cual tabata e costo total di ATA compara cu e beneficio? Cuanto placa ATA a sponser of ATA mes a gasta relaciona cu e festival aki ?
Retorno riba inversion (ROI)
Maske e artistanan a duna bon presentacion, un proyecto financia cu fondonan publico mester wordo medi cu indicadornan di rendimento. Te na e momentonan aki, falta data concreto riba:
Target: Cual tabata e target specifico cu a purba atrae?
Conversion: Cuanto turista nobo a biaha pa Aruba exclusivamente pa e evento aki? Cuanto asiento di avion a bende y cuanto kamber di hotel ?
Impacto Economico: Sin cifra cla, ta bira dificil pa hustifica si e inversion a cumpli cu un obhetivo economico real.
E fenomeno di e “ticketnan gratis”
Un di e aspectonan mas cuestionabel tabata e distribucion masivo di ticketnan gratis na studiantenan, bao di e nomber di “embahadornan turistico”.
E decision aki a los un efecto riba plataformanan social manera Facebook, vraag en aanbod, unda a observa un benta den gran escala di e ticketnan aki na prijsnan hopi mas abou cu e balor oficial. Esaki a resulta den:
Un golpi pa e producto turistico mes.
Un zakgeld personal pa e studiantenan riba inversion di ATA.
Un influencia negativo den e entrada proyecta pa benta di ticket.
E situacion aki ta mustra e falta di control y e necesidad di un miho maneho den futuro pa evita cu fondonan destina na promocion ta bira un fuente di ganashi priva sin ningun control.
Na final: ATA mester rindi cuenta
E concierto/ festival aki no por pasa bay sin cu ATA rindi cuenta. Aruba tin mester di eventonan di calidad, pero esakinan mester wordo planifica cu un vision di profesionalismo, transparencia total y, riba tur cos, un beneficio tangibel pa e comunidad y e economia local.
Un inversion miyonario, unda hasta ATA a paga avion pa hiba periodistanan te Colombia pa un rueda di prensa, ta parce mas bien cu poco schroef a los den ATA!
Ta indica cu ATA tin asina hopi placa, cu ya nan no sa mas kico pa haci cune, pero un cos ta sigur: mester gast’e.
ATA BANK SHARE:
E gastamento aki ta trece e pregunta clave: ATA merece e 57% di e tourism levy, na rason di 145 miyon florin pa aña?
