Awe mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e hombernan E.A. y J.S.O.
SOLO DI PUEBLO por a compronde cu Hues a haya cu E.A. y J.S.O. ta envolvi den e importacion cu 379 kilo di marihuana y 335 kilo di cocaina. Fiscal a exigi 10 aña di prison pa E.A. y 9 aña di prison pa J.S.O. Hues a condena E.A. y J.S.O. na castigo di prison mas abao cu loke Fiscal a exigi.
SENTENCIA
Hues a bisa cu e ta haya e hombernan E.A. y J.S.O. culpabel di importacion di lote grandi di marihuana y cocaina riba 8 Juni 2024. Guarda Costa a intercepta e boto na Eagle Beach. Hues a bisa cu e no ta haya proba e acusacion di e 3 revolvernan cu tambe a haya riba e boto. Hues a bisa cu tin imagennan di video di seguridad caminda ta mira auto ta core mainta trempan ta bay pa Eagle Beach. El a sigui bisa cu tin declaracion di e homber I., kende a wordo gara riba e boto, cu a reconoce E.A. y J.S.O. riba potret cu Polis a mustr’e. E homber I. a declara cu E.A. y J.S.O. tabata presente ora cu e boto a yega Eagle Beach. El a bisa cu J.S.O. tabata core e auto. Hues a sigui bisa cu tambe tin e combersacion scucha door di Polis caminda J.S.O. ta puntra I. si e ta cla pa haci e viahe. Hues ta haya cu E.A. y J.S.O. a prepara e boto pa bay haci e viahe y nan tabata na Eagle Beach pa ricibi e droga. Hues tambe ta haya proba cu E.A a exporta cocaina riba 3 October 2024 na aeropuerto. Hues a sigui bisa cu J.S.O. a wordo haya cu un bloki di cocaina.
Hues a bisa cu e ta haya J.S.O. culpabel di a maltrata su pareha. Hues a mustra cu J.S.O. mes a declara cu el a bebe hopi biña e dia ey y ta lamenta loke el a haci.
CASTIGO
Pa cu e castigo, Hues a bisa cu en total 714 kilo di droga a keda confisca. Hues a bisa cu droga ta causa miseria den famia y ta fomenta criminalidad. Hues a bisa cu mester baha pisa riba criminalidad di droga. Ademas a gara E.A. na aeropuerto cu droga y tambe J.S.O. Hues a cuestiona e hecho cu J.S.O. a corta su pareha cu cuchiu mientras cu e pareha tabatin nan yiu chikito den braza. Hues a tuma J.S.O. na malo pa esaki. Hues a bisa cu Fiscal a exigi pa J.S.O. 9 aña di prison y pa E.A. 10 aña prison. Hues ta haya cu en principio E.A. y J.S.O. mester haya e mesun 7 aña di prison, cu esnan den e boto carga cu droga a haya. Pero mester tene na cuenta e otro delitonan cu E.A. y J.S.O. a haci. Hues a condena E.A. na 7 aña y 6 luna di prison y J.S.O. na 7 aña y 9 luna di prison. E droganan a wordo destrui, e placanan lo wordo debolbe.
