Cooperacion cu Union Europeo a contribui significativamente na desaroyo di proyectonan di conservacion na Aruba, cu enfoke riba proteccion di naturalesa y educacion ambiental. Esaki a keda evidente den e experiencia comparti pa Tyson Lopez, Director General di Aruba Conservation Foundation (ACF)
Un di e proyectonan mas reciente ta “Turning the Tide Project”, implementa entre 2023 y 2025 den colaboracion cu Universidad di Wageningen, Universidad di Aruba y ScubbleBubbles Foundation. E proyecto a enfoca riba restauracion di koral y ecosistema di mangel.
Den e componente marino, a desarrolla rif artificial y a planta coral riba structuranan special, mientras cu den area di mangel, boluntarionan a haci limpi y habri canalnan pa mehora circulacion di awa. E proyecto a culmina cu un documental cu a registra e proceso completo durante dos aña.
Segun Lopez, e iniciativa aki a contribui significativamente na concientizacion y educacion ambiental dentro di comunidad, y ta considera como un di e proyectonan mas exitoso den region Caribe.
Como continuacion di e esfuerso aki, recientemente a aproba un proyecto nobo cu yama “REEFLECT”, cu lo sigui enfoca riba restauracion di coral, incluyendo instalacion di mas rif artificial y mayor participacion di comunidad local.
Lopez a enfatisa cu Union Europeo a hunga un rol importante den desaroyo di conservacion na Aruba durante e añanan. Entre e proyectonan historico destaca e establecimento di Parke Nacional Arikok, incluyendo construccion di centro di bishitante y infrastructura pa haci e parke mas accesibel.
“Union Europeo ta nifica hopi pa conservacion di Aruba,” Lopez a indica, subrayando cu e colaboracion internacional ta continua di ta esencial pa proteccion di naturalesa y desaroyo sostenible di e isla.
