Corte di Prome Instancia di Aruba a duna su sentencia dia 25 di maart 2026 den un caso tocante un peticion pa informacion cu a ser manda door di Aruba Fair Trade Authority (AFTA) den e cuadro di un investigacion di competencia.
Corte a dicta cu un peticion pa informacion di AFTA, cu e obhetivo pa haya datonan factibel den cuadro di un investigacion, no ta wordo considera un decision (beschikking) den sentido di LAR (Landsverordening administratieve rechtspraak). Un peticion asina no tin efecto huridico riba su mes y pa e motibo ey no por wordo reta por medio di un oposicion ni apelacion.
Segun Corte, AFTA a declara corectamente cu e oposicion contra e peticion di informacion ta inadmisibel. Como consecuencia di esaki, Corte a declara e apelacion como infunda.
Cu e sentencia aki, Corte ta confirma cu AFTA, ora di haci investigacionnan di mercado, por hasi uso di su podernan, segun ley, pa pidi informacion, sin cu e peticion pa informacion mes por wordo considera como un decision y contra di cual no por entrega un apelacion huridico.
Roly Sint Jago, presidente di hunta di AFTA: “Empresanan na Aruba tin e obligacion di coopera cu investigacionnan di AFTA. No tin espacio legal pa opone contra esaki. Si empresanan no coopera, AFTA por impone sancion.”
AFTA ta e autoridad independiente y imparcial di Aruba cu ta supervisa e funcionamento corecto di mercadonan na beneficio di empresa y consumidor. AFTA ta investiga mercadonan riba Aruba y ta actua si tin infraccion contra ley. AFTA tin podernan pa preveni mal comportacion di empresa y si ta necesario lo sanciona.
