Ministerio Publico (OM) di Aruba a ofrece Ministerio Publico di Amsterdam pa pone henter e dosier Arubiano tocante e caso di desaparicion di Natalee Holloway na nan disposicion. Esaki Ministerio Publico di Amsterdam tin mester pa evalua e denuncia di asesinato y/of homisidio cu e mama di Natalee Holloway a haci recientemente cerca Ministerio Publico di Amsterdam.
Dia 18 di october 2023, Ministerio Publico di Aruba a tuma nota di informacion den medionan di comunicacion Mericano cu Joran van der Sloot lo a confesa den e estado Mericano Alabama cu el a mata Natalee Holloway na Aruba na aña 2005.
En bista di esaki, Ministerio Publico di Aruba a manda un peticion di asistencia legal dia 19 di october 2023 pa Ministerio di Husticia di Estados Unidos. Den e peticion di asistencia legal aki a pidi cooperacion pa obtene tur documento cu por sirbi como prueba den e caso di desaparicion di Natalee Holloway, incluyendo e declaracionnan di Joran van der Sloot. Ministerio di Husticia di Estados Unidos a duna cooperacion completo y finalmente na januari 2026 a entrega un gran cantidad di e documentonan pidi na Ministerio Publico di Aruba.
Investigacion mas profundo di e documentonan entrega te asina leu no a conduci na prueba pa asesinato of homisidio cualifica. Komo cu e delito di homisidio a prescribi caba na Aruba, persiguicion penal di Joran van der Sloot pa homisidio na Aruba no ta posibel mas.
Den mita di maart, e mama di Natalee Holloway a haci un denuncia di asesinato y/of homisidio contra Joran van der Sloot cerca Ministerio Publico di Amsterdam.
Debi na e vencimento di e termino di prescripcion pa homisidio na Aruba y mirando e denuncia cu a wordo haci na Hulanda, Ministerio Publico di Aruba lo pone e dosier na disposicion di Ministerio Publico di Amsterdam. E termino di prescripcion na Hulanda no a vence ainda. Komo cu ta trata di un sospechoso Hulandes, persiguicion na Hulanda den principio ta posibel.
