Miembro di Parlamento di AVP, Stephany Sevinger, ta recorda cu e mes a alerta repetidamente den pasado tocante irregularidadnan serio na Aruba Wastewater Sustainable Solutions (AWSS). Awe, despues di un aña di liderazgo di gobierno AVP-Futuro, ta bira cada dia mas cla cu e decisionnan tuma pa cambia rumbo ta acercando Aruba na solucionan mas realistico pa problematica cu comunidad a experimenta den e ultimo añanan.
Segun Sevinger, sector di utilidad na Aruba tabata bayendo den un direccion peligroso, irresponsabel y negligente, cual por a resulta den daño financiero y institucional extremadamente serio si e rumbo di gabinete anterior a continua.
“Nos a hereda un situacion cu tabata fuera di control. No tabata trata di simpel ineficiencia, pero di un problema profundo den gobernacion, disciplina financiero y responsabilisacion,” asina MP Sevinger a declara.
Durante añanan, institucionnan importante a opera sin presupuestonan cla, sin planificacion pa largo plazo, sin control interno of externo, y sin supervision efectivo di board of accionistanan. Esaki a crea un sistema unda decisionnan tabata tuma sin base solido, sin “checks and balances”, y sin ningun forma real di accountability.
Parlamentario Sevinger ta indica cu e ehempelnan ta contundente. Na Utilities Aruba, gastonan operacional a subi drasticamente den poco aña, proyectonan a sali for di control, y decisionnan financiero a wordo tuma sin aprobacion formal. Contractnan grandi a continua aun despues cu a wordo duna instruccion cla pa stop, y advertencianan serio — incluyendo esun di un whistleblower — no a wordo atende te ora cu presion externo a forza accion.
“Esaki no ta simpel mal maneho. Esaki ta un falta di integridad institucional,” Sevinger a enfatisa. Den e caso specifico di AWSS, MP Sevinger a bisa cu e situacion tabata particularmente preocupante. Sin gobernacion financiero cla, sin presupuesto formal, y cu dependencia grandi riba ingresonan incierto, e compania tabata na un trajecto cu por a pone Aruba den un posicion financiero insostenibel.
Segun e analisis, si e rumbo anterior a continua, AWSS lo por a carga cu mas di 250 miyon florin den debe, sin claridad suficiente tocante origen y justificacion di e inversionnan grandi — incluyendo plan pa construi un planta nobo sin cu e problemanan urgente di operacion a wordo resolvi prome. Un situacion asina lo a pone finalmente e carga financiero riba lomba di pueblo di Aruba.
Parlamentario Sevinger a subraya cu e cambio di direccion implementa durante e ultimo aña a evita precisamente e riesgo aki. En bes di sigui cu inversionnan grandi sin control, e profesionalnan capacita na cabes awo, ta enfoca riba mantenimiento, optimisacion di instalacionnan existente, y fortalecemento di transparencia den gestion.
“Pa di prome biaha den aña, pueblo ta wordo informa na tempo ora tin problema of irregularidad. Esaki ta un cambio fundamental: di tapamento pa transparencia, di improvisacion pa profesionalismo,” asina Sevinger a declara.
E ta reconoce cu ainda tin trabou pa haci, pero a enfatisa cu direccion actual ta trata di coreccion serio y responsabel. “Esaki no ta trata di bisa cu tur cos ta perfecto. Ta trata di pone un alto na un sistema cu tabata bayendo den un direccion equivoca. Si nos a laga e rumbo anterior sigui, awe nos lo no tabata papia di inefficiencia, pero di un crisis financiero y institucional completo.”
Finalmente, e parlamentario ta indica cu e leccion principal ta cla: ora no tin control, ora no tin supervision, y ora decisionnan ta wordo tuma sin responsabilidad, pueblo ta paga e consecuencia. Pero ora tin estructura, transparencia y disciplina financiero, institucionnan publico por cumpli cu nan rol pa proteha interes di comunidad.
“Esaki ta e diferencia entre pasado y presente: entre caos y control, entre riesgo y responsabilidad, entre un sistema cu a faya y un sistema cu nos ta reconstrui. Nos mester sigui fortifica gobernacion, impone disciplina financiero, y garantisa cu tur institucion publico ta traha pa beneficio di pueblo — no pa nan mes.”
