General Manager Joe Najjar, ta celebrando binti aña na cabes di La Cabana Beach Resort & Casino, un logro remarcabel den posicion di liderazgo n’e hotel. Najjar ta un ehecutivo veterano den hospitalidad pa mas di trinta aña cu experiencia internacional, particularmente na Aruba. El a traha cu marcanan hotelero grandi manera Wyndham, Radisson, y Marriott. El a cuminsa su carera den F&B Management trahando na Aruba desde añanan 1990, prome cu a avansa pa rolnan ehecutivo mas grandi den exterior, incluyendo posicion di general manager na Colorado y Puerto Rico.
El a regresa Aruba na 2005-2006 pa bira General Manager na La Cabana. E tempo ey e propiedad tabata enfrentando retonan operacional grandi como tambe financiero, incluyendo e necesidad pa un renobacion grandi – separando e dos entidadnan di La Cabana y Villas, cual a bira Eagle Aruba.
Najjar tabata tras di e esfuersonan haci pa stabilisa y modernisa e hotel, mehorando operacionnan, control di costo, como tambe pa engrandece e experiencia di e huesped.
Bao di su liderazgo largo, e hotel a pasa door di renobacionnan grandi, a fortalece su reputacion como destinacion lider den timeshare, anto a ricibi diferente premio y reconocemento – kedando reconoci pa su liderazgo personal y trabaonan general cu el a bin ta ehecuta.
Najjar ta miho conoci pa tin un estilo ‘hands-on’ den su liderazgo dus e ta un persona cu ta stima ta riba veld enfoca riba desaroyo di empleado, calidad di servicio, y sostenibilidad. El a hunga un rol grandi tambe den desaroyo di Aruba su sector turistico, sirbiendo posicionnan di liderazgo dentro di organisacionnan den e industria y contribuyendo na diferente iniciativa comunitario. Najjar su carera ta defini pa liderazgo operacional fuerte cual a haci un impacto significativo den Aruba su industria di hospitalidad.
