Awe Prome Minister mr. Mike Eman hunto cu Secretario General Robert Candelaria y Minister mr. Wendrick Cicilia a haci un recorido extenso pa bishita e diferente area di campamentonan rond di Aruba. For di mainta trempan te cu despues di merdia a pasa den varios localidad, conectando directamente cu e comunidad, campadonan hunto cu autoridad manera wardacosta, polis pero tambe Cruz Cora y ambulance.
E bishitanan a enfoca riba bienestar di comunidad, siguridad y tambe conscientisacion riba mantencion di limpiesa durante e periodo di campamento. Cu miles di hende disfrutando di nos beach diariamente, e importancia pa mantene Aruba limpi ta mas relevante cu nunca.
Den colaboracion cu varios instancia gubernamental y otro organisacion no gubernamental ta haci trabou continuo pa garantisa siguridad riba tera y lama. Prome Minister a expresa su aprecio na tur esnan cu a pesar di e temporada festivo ta dedica nan mes na sirbi nos comunidad. Aruba por ta agradecido pa nos “first responders” nan curashi, balentia, dedicacion y sacrificio pa tene nos isla sigur. A pesar di tur reto hunto nos t’ey pa pueblo.
Un elemento clave e aña aki ta e colocacion strategico di e bakinan di sushi na diferente beach rond di e isla. Cu sosten di Serlimar y Ecotech, campadonan y bishitantenan tin acceso mas facil pa deshaci di sushi na un manera responsabel.
Baki di sushi ta disponible na:
- Arashi Beach
- Eagle Beach
- Bushiri
- Surfside Beach
- Santo Largo
- Rodger’s Beach
- Baby Beach
- Zwarte Mangel
Prome Minister Mike Eman ta haci un yamada na tur ciudadano y bishitante pa uza e facilidadnan aki y contribui na un medio ambiente mas limpi. “Mantene nos beachnan limpi ta un responsabilidad comparti”, segun e mensahe comparti durante e recorido.
Adicionalmente a haci un apelacion special na tur campado pa pone atencion na siguridad di mucha y cuido mutuo entre famia y amigo, pa asina evita incidente y mantene un ambiente saludabel. Tambe Prome Mintser Mike Eman a expresa su gratitud na medionan di comunicacion pa nan rol importante den mantene comunidad informa. Cu cooperacion di un y tur, Aruba por sigui disfruta di un gran Pasco den alegria union y mas cu tur cos, siguridad.
