Cu inicio di trabounan den bario De Vuyst, Gobierno di Aruba y FCCA ta pone un paso concreto den direccion di renobacion y fortalecemento di comunidad, cu enfoke no solamente riba infrastructura, pero riba calidad di bida di su residentenan.
E proyecto ta forma parti di enfoke, unda renovacion di casnan, mehoracion di entorno y creacion di espacionan recreativo ta bay man den man cu bienestar social.
Prome Minister Mike Eman a destaca cu e vision di gobierno ta pa logra un progreso cu por sinti den bida diario di hende, den nan cas, nan entrada y nan bario.
Den e fase aki, lo renoba aproximadamente 40 cas, hunto cu mehoracion di infrastructura, caminda, area pa recreaccion y espacio comunitario. E iniciativa ta sigui, manera proyecto anterior na Mabon y ta forma parti di un plan mas amplio cu ta inclui Bushiri, como e siguiente proyecto.
Bos di comunidad: cambio cu esperansa, pero cu necesidad pa continuidad
Pa e residentenan, e impacto di e proyecto ya ta visibel, aunque tin expectativa pa mas mehora.
Errol Mitchell a comparti cu despues di hopi aña di deterioro, e cambio ta notabel awo si:
“Antes tabata den mal estado, pero aworaki nos ta mira cu cosnan ta bira mas bunita. Ya a cuminsa mira limpiesa y mehoracion di e bario.” El a enfatisa e importancia di mantene limpiesa consistentemente: “Limpiesa di un dia no ta basta, mester ta continuo.”
Maria John di su banda a indica cu mester pone enfasis riba siguridad y infrastructura basico: “Nos mester sinti mas siguridad den e bario y e luznan mester ta drecha.”
Atalia Piternella: “Ta bira miho. Nos ta sinti e diferencia.”
Mas cu renobacion: un enfoke integral
Ademas di e trabounan fisico, gobierno ta sigui implementa medidanan social manera aumento di pension, mehoracion di acceso na cuido medico y dialogo riba salario minimo, cu meta di logra un prosperidad mas comparti.
Limpiesa, siguridad y mantencion di bario ta keda punto clave, cu colaboracion entre gobierno y comunidad como factor decisivo pa logra resultado duradero.
Prome Minister Mike Eman a subraya cu e cambio real ta logra ora gobierno y comunidad ta traha hunto: “Aruba ta nos, Aruba ta abo, hunto nos ta crea e cambio.”
