Parlamentario Richard Arends (AVP): Maneho financiero, economico y laboral ta desconoci

For di 13 di november ultimo, dia u e yega na un acuerdo cu Hulanda pa sosten financiero, no a tende nada mas di Gobierno riba e agenda di ehecucion di loke a wordo palabra. Segun Parlamentario mr. drs. Richard Arends (AVP), nos a cuminsa sinti e efectonan di e acumulacion di medidanan, pero tin un incertidumbre grandi riba e maneho di gobierno di forma integral pa aña 2021. E Parlamentario ta haña falta di un maneho economico riba termino cortico, como tambe pa solucionan pa e retonan di mercado laboral cu ta eminente.

A corta den salarionan di empleadonan publico, como tambe gastonan di cuido medico. Mientras cu ta corta den AZV, no ta scucha mediconan y esakinan ta haña nan mes ta cana nan mesun caminda pa nan wordo scucha. Parlamento lo trata pronto e cambio di ley di expulsion y admicion unda cu tur ambtenaar hulandes por establecenan mes akinan y traha hunto cu nan famia. “Pa 6 luna di sosten di likides a compromente nos mes den un regimen di 7 aña largo sin cu pueblo tin un idea con e medidanan lo afect’e,” segun Parlamentario Richard Arends.

Parlamentario Richard Arends ta puntra su mes ki dia y con nos ta haña sa con lo cuminsa aumenta ‘efectividad den aparato gubernamental’, cu ta un palabra nechi pa ‘reduci e cantidad di personal den aparato gubernamental’. Gobierno tin un plan social riba mesa? A cuminsa involucra sindicato pa dialoga riba e situacion? Mientras cu e pakete di reforma ta papia di introduccion di un btw di 12.5%, Gobierno a anuncia cu ta baha tarifa di loonbelasting. Algo su siguramente ta duna alivio, pero ta contrario na loke a wordo palabra y e reforma structural di nos sistema di impuesto ta keda na palabra so.

Con nos por sigura cu nos forsa laboral di 46 mil hende lo por tin un entrada den e proximo 2 pa 3 añanan mientras cu Gobierno a compromete su mes cu flexibilisacion di mercado laboral? Segun Arends, pan riba mesa y un entrada husto tambe ta parti di sostenibilidad y un economia ‘resiliente’ – un palabra nobo cu Gobierno a inventa. “Nos ta wak cu Gobierno ta selectivo den algun accion, pero no tin un plan integral pa atende cu e pakete di reforma cu e palabra. Fraccion di AVP ta lamenta cu no tin responsabilidad politico ni pa sali dilanti di bin splika, pero ta manda voceronan di departamento anuncia cambionan di maneho,” Parlamentario Arends a bisa.

“Nos ta hiba un oposicion responsable: nos no ta crea panico, ni ta profeta di desaster pero nos tin e deber di alerta pa loke nos sa cu ta bin na caminda y unda Gobierno como actor principal ta ausente. A wordo anuncia cu na maart presupuesto lo wordo trata den Parlamento, tanten no tin claridad riba e maneho financiero 2021. Esaki ta un situacion sumamento preocupante pasobra algun luna despues Parlamento lo ta demisionario. Gobierno a declara aña 2021 como aña di recuperacion, pero partnernan strategico manera AAA y ATA tin pronosticonan contrario,” Parlamentario Arends a finalisa bisando.