Na Aruba, nos tur ta sa con e ritmo di turismo ta move. Tin luna cu ta bula di hende, hotelnan yen, restaurantnan rand rand, y tin otro luna e actividad ta baha notablemente. Un di e luna mas reconoci pa e caida ta luna di Mei. Esaki no ta nada nobo; ta algo cu sector turistico a sinti pa hopi aña.
Pero e pregunta importante aworaki ta: kiko e Aruba Tourism Authority (ATA) ta haci pa enfrenta e situacion aki?
Anteriormente tabatin cierto festivalnan cu ta atrea cantidad di turista. Asina nos por a sobrebibi luna di Mei. Pero e festival no tey mas.
Loke ta haci e situacion mas preocupante ta e decisionnan reciente. Na luna di Maart, un periodo cu ya ta considera temporada halto, a organiza eventonan grandi, incluyendo conciertonan. Pero, pakiko inverti den luna cu ya tin turista ? No tabata mas logico pa move e tipo di evento ey pa luna di Mei, ora e isla realmente tin mester di impulso?
E falta di strategia cla ta crea frustracion. Empresarionan, trahadornan, y hasta bishitanten fielnan ta mira e patron aki y no ta compronde e logica tras di dje. Aruba no por depende solamente di temporada halt; nos economia tin mester di balance.
E rol di ATA no ta solamente promove Aruba den mundo, pero tambe pensa strategicamente riba con pa mantene consistencia den fluho di turismo. Si luna di Mei ta un punto debil, e solucion no ta ignor’é, pero enfrent’e cu creatividad, planificacion y compromiso.
Awor mas cu nunca, ATA mester duna claridad: Tin algun plan move turismo den luna di Mei? Ta existi un strategia pa distribui turismo den e aña? Of ta sigui inverti principalmente den luna cu ya ta fuerte?
Aruba merece un vision mas sostenibel. Nos no por keda repiti mesun errornan mientras oportunidadnan ta pasa bay.
Luna di Mei no mester ta un luna morto. Cu e direccion correcto, e por bira un di e momentonan mas interesante y autentico di nos calendario turistico.
Pero pa esey sosode, mester un liderazgo nobo. Un liderazgo cu no lo organisa un mega concierto den Maart, pero cu por a prepara algo pa Mei. Y tur wowo ta awor riba ATA. ATA ta wordo dirigi ainda pa profesionalismo? of pa Amigo?
