ORANJESTAD – Loke tabata un paso importante pa modernisacion di sistema di husticia na Aruba, a bira awor un ehempel cla di falta di vision y desicion politico cuestionabel. Proyecto pa comberti e edificio di ex-Codemsa den un Centro di Husticia, cual a wordo aproba unanimemente na 2022, a wordo para abruptamente bou gobierno di AVP pa Arthur Dowers.
E iniciativa aki, cual tabata conta cu sosten di e ex-minister Rocco Rjon di MEP, tabata tin como meta pa reuni diferente departamentonan manera Polis Aruba (KPA), Inmigracion, CEA y Bureau City Inspector bou un solo dak. Esaki lo no solamente mehora coordinacion, pero tambe reduci gastonan di huur priva cu actualmente ta pone presion riba presupuesto di gobierno.
Segun informacion cu Sindicato di Polis (SPA) a divulga diabierna, e noticia a yega como un sorpresa grandi pa hopi trahadornan den sector di husticia. Despues di un proceso amplio, cu consultacion di sindicatonan y expertonan, y hasta cu un destaho publico na april 2024, gobierno a dicidi pa kita plug di e proyecto sin mustra un plan alternativo.
E decision aki no ta nada menos cu un golpi pa polis. Den un momento caminda seguridad publico ta un tema serio, polis mester traha bou condicionnan optimal. E proyecto tabata hustamente dirigi pa crea un ambiente di trabou moderno, eficiente y centralisa. Awor, tur esey a cay na awa.
Critica principal ta riba falta di consistencia di gobierno. Con ta posibel cu un proyecto aproba unanimemente, cu inversion di alrededor di 20 miyon florin y cu amplio sosten tecnico, ta wordo poni un banda sin splicacion transparente? Esaki ta laga un sabor amargo di politica robes, unda interes di pueblo ta wordo pone na segundo luga. Y naturalmente huur priva ta sigui lora.
Ademas, e decision ta manda un mensahe negativo na sector publico: ningun proyecto no tin garantia, aunke e pasa tur proseso legal y tecnico. Esaki por afecta confianza den gobierno y desmotiva inversionnan futuro.
Gobierno di AVP awor tin un deber pa duna clarificacion na pueblo di Aruba, y mas importante ainda, na polisnan cu diariamente ta traha pa mantene nos isla sigur. Sin un plan cla, e decision aki ta un paso atras na lugar di progreso.
Na final di dia, pregunta principal ta: ken realmente ta paga e prijs di e decision aki? Contesta ta cla: nos polis, y henter pueblo.
E edificio di ex codemsa/ ex Aruba airlines ta di APFA ( cu ta atende pensioen di ambtenaar).
Hopi placa cu actual ta wordo usa pa paga huur priva lo a wordo termina y varios departamento lo a bay bao un solo dak, pa asina por traha mas eficiente.
Ta di lamenta, cu just pasobra ta projecto di MEP, Partido AVP no por soporte y mester a kibre.
