Fraccion di MEP a ricibi un carta di Minister Gerlien Croes den cual el’a coregi su carta anterior unda pa casi tur pregunta el’a simplemente contesta “mira pregunta 1”. Dentro di dos siman, e minister a reconoce cu e manera di contesta tabata inapropia y a bin cu un contestacion revisa. Esaki ta un paso den bon direccion y mustra cu presion parlamentario ta funciona.

Sin embargo, no tur pregunta ainda a wordo contesta completamente. Particularmente, e preguntanan financiero tocante e gastonan di e biahe ainda ta sin un contesta cla y completo. Esaki ta serio, pasobra ta trata di uso di placa publico.

E biahe en cuestion tabata pa atende un reunion di Rijksministerraad na Hulanda dia 31 di october 2025. Segun e minister , no tabata tin ningun punto riba agenda cu tabata relaciona directamente cu Aruba. No obstante, pa un biahe di apenas un dia di trabou, a haci gastonan halto pa bula bai te Hulanda.

Pueblo di Aruba tin derecho di sa con su placa ta wordo gasta. Transparencia tocante gastonan publico no ta un luho ni un opcion politico. E ta un obligacion fundamental. Esey ta algo cu minister Gerlien Croes mester siña ainda, pasobra den e caso di e jet priva ainda e no a contesta. Ora informacion financiero no ta wordo comparti completamente, e confianza di pueblo den gobierno ta wordo afecta.

Fraccion di MEP ta enfatisa cu Parlamento lo sigui exigi contestacion completo riba tur pregunta, specialmente ora ta trata di placa di pueblo. Sin transparencia, no por tin control. Y sin control, no por tin confianza.

Confianza di pueblo no ta algo cu bo por djis pidi, bo mester gan’e cu transparencia.

RELATED ARTICLESMORE FROM AUTHOR