Den un pais cu ta proclama democracia como su base, loke ta pasando awe den Parlamento di Aruba ta lanta pregunta serio: ta Parlamento ainda ta representa pueblo of ta hungando un wega pa silencia nan? Parlamentario Eduard Pieters di fraccion di PPA a lanta un denuncia fuerte: un peticion formal pa un reunion publico, entrega desde 3 di juli 2025, ta ignora pa mas cu 8 luna of 240 dia, mientras Reglamento di Ordo ta stipula claramente cu e presidente di Parlamento mester convoca esaki dentro di 30 dia. “Esaki no ta un eror administrativo,” Pieters a declara. “Esaki ta un falta grave di respet pa nos democracia.”
Reglamento no ta opcion sino un obligacion
Reglamento di Parlamento no ta un sugerencia. Ta un cuadro legal, cu ta garantisa cu bos di minoria tambe ta haya oido. Ora ta cumpli cu e cantidad di sosten pa un reunion, presidente di Parlamento tin obligacion pa actua.Pero den e caso aki, a ignora e obligacion aki completamente. Resultado? Un retraso di mas di 240 dia riba un derecho democratico basico.
“Si nos no ta respeta nos propio reglamento, con nos kier exigi respet di otro?” Pieters a cuestiona.
Un patronchi di blokeo y sensura
Segun fraccion di PPA, esaki no ta un incidente aisla. Ta parti di un patronchi mas amplio:
E iniciativanan di oposicion semper ta retrasa, debate publico ta limita y bos critico ta silencia.
“E meta ta cla: silencia preocupacionnan cu pueblo ta biba,” Pieters a afirma.
Esaki ta crea un percepcion peligroso, unda cu Parlamento no ta funciona como un espacio liber di debate, pero como un instrumento controla y maneha pa gobierno.
Agenda manipula pa exclui oposicion
Situacion a bira mas serio ainda, ora cu fraccion di PPA a informa formalmente na Parlamento riba un biahe di trabou pa Hulanda. Un biahe planifica responsablemente, mirando cu agenda tabata completamente bashi. Pero diripiente, presidente di Parlamento a manda yama varios reunion y a planea tur den e siman cu PPA no por ta presente. “Den un siman, mas reunion cu normalmente ta convoca den un luna completo,” Pieters a señala. “Esaki no ta coincidencia, esaki ta un intento di exclusion of boycot.” E pregunta cu el a lanta ta directo: Kico ta e intencion tras di e accionnan aki?
