Parlamentario Endy Croes: Ta reta tur Parlamentarionan di AVP-Futuro
“PUT YOUR MONEY WHERE YOUR MOUTH IS” y VOTA CONTRA JAARREKENING 2020
Parlamentario Endy Croes a tuma nota di un campaña negativo primordialmente di Parlamentarionan di AVP alrespecto un rapport di Algemene Rekenkamer cual recien a wordo publica riba Jaarrekening di aña 2020 di Pais Aruba.
Tur esaki ta entre otro pa despista e hecho cu e siman aki (14 di April) tin riba agenda e veredicto final di Cassatie di e caso Avestruz di Benny Sevinger x minister di AVP.
Manera pueblo ya caba ta na altura cu Benny Sevinger (AVP) den luna di Juli 2024 a wordo condena pa Hoger Beroep (HOF) na 4 aña di prison enconnecion cu e corupcion di mas grandi cu Pais Aruba conose den su historia. Por menciona cu (3) Hues a kita (incauta) por ehempel 2.4 miyon florin cu a wordo haña riba un cuenta na ORCO Bank Corsou procedente di bentanan di tereno cual ta parti di e “pay back” cu Benny Sevinger tabata ricibi. Alabes a prueba con amigonan di AVP kendenan tabata haña tereno y ta bende esakinan despues tabata duna Benny regaldo y drecha cas di Benny.
Den e veredicto di HOF por a lesa por ehempel amigonan a regala Benny Sevinger un Vectra Gym di 20 mil florin, a cumpra un drip system pa muha e hardin na su cas na balor di 25 mil florin, a cumpra un hekwerk pa su cura di cas na balor di 15 mil florin, a paga fiesta di “quinceañera” di su jui muher na balor di 8000 us dollar y asina por continua cu un lista masha largo. E siman aki (5) Hues na Hulanda lo duna e veredicto final. Parlamentarionan di AVP kier sconde kiko ta na caminda y kier pone luz y atencion solamente riba e rapport di ARA !
ARA a ripiti lokual nan a skirbi caba na 2022:
Dia 28 di April 2022 pues 4 aña pasa ARA a publica un rapport specificamente riba FASE. ARA ta gaba e desicion di Gobierno pa brinda mas di 15.000 hende cu FASE como cu nan a perde entrada di un dia pa otro. Alabes ARA a splika cu no tin un ley “inplace” pa cubri esaki y a conseha gobierno pa traha riba e ley. Juli 2022 e ley di Tijdelijke FASE a wordo aproba den Parlamento. ARA a splika desde 4 aña pasa cu no obstante bin cu un ley pa formalisa e pagonan aki “achteraf” no ta remedia e acto iligitimo(onrechtmatig) cu a tuma lugar durante covid 19 na e momento ey. ARA a ripiti esaki den un rapport recien(maart 2026) cu nan a publica riba Jaarrekening di aña 2020 di pais Aruba.
Awor apenas Parlamentarionan di AVP a “spierta” y kier cuestiona FASE mientras mesun informacion aki ta den e rapport di ARA cual a keda publica 4 aña pasa desde April 2022 riba FASE. Na soño boso ta?
Desicion di Evelyn Wever Croes y Xiomara Maduro e tempo aya tabata pa combati hamber y pobreza den e situacion abrupto cu Covid a bin cune unda masha hopi hende a perde trabou enespera. No por a warda 2 anja pa traha un ley prome y yuda nos cuidadanonan despues. Door cu nunka Bo a goberna bo no lo compronde.
Ta reta parlamentarionan di AVP-Futuro publicamente:
Parlamentario Endy Croes ta reta Parlamentarionan di AVP-Futuro. No hunga rol solamente den prensa. Pero “put your money where your mouth is”. Back up Boso palabra, promesa y creencia cu accion concreto. Dia Parlamento trata Jaarrekening di aña 2020 di Pais Aruba mi ta reta boso pa vota contra. Mi lo bin cu e corant y e artikel aki Parlamento e dia ey pa recorda boso prome boso vota. Mi ta garantisa pueblo e dia ey lo conose hopi galiña cu lo “chicken out”. Esey ta varios di e Parlamentarionan di Coalicion conosi como politiconan sin weso di lomba of tambe politiconan Panlefi!
