Nos relato di e siman aki lo ta uno un crenchi mixto, bayendo bek den tempo un crenchi atrobe pa comparti toch un par di potret bunita di un di nos actividadnan bunita cu a tuma lugar luna pasa den Maart, y pic di nos Poem Tshirt patrocina pa ATA y un actividad di futbol na Yami Yami cu mi bunita amiga Verna y algo mas cu varios ya a hanya un crenchi atencion den un di nos relatonan pero cu no a sali cu e picsnan den Diario pa motibo cu Nilton tawata cu vakantie y ta mayoria bes ta e ta traha riba nos relatonan cu su curason professional. Nos no ta relata ful e storia di nobo, sino, ta just menciona cu lectornan ta gusta wak e impresionnan bunita hunto cu e relato. Danki na Awe Mainta, EANEWS, solo di pueblo y Extra Bonaire cu a pone e relato cu su picsnan,sperando cu e biaha ki si Diario tambe lo sigi publica nos relato plus pics, cu ta wordo hasi atrobe awor cu Nilton ta bek na trabao despues di su vakantie bon mereci. Cu un danki grandi di nos curason pa gerente di Diario cu tambe ta stima y kere den nos lectornan grandi di edad.
Nos ta papiando di e anochi di Poeta Patria cu a cana nechi e anja aki y cu a tuma lugar na San Nicolas Store Kulture Cafe den curason di San Nicolas y no den un tent. Y papiando di curason, nos curason ta hopi disapunta den HOH hospitaal cu a bisa nos un luna pasa cu nan ta bay manda e carta priminti, pero te cu awe den April 2026 ainda no a ricibi ningun carta. Nos tambe ta contento cu mientras tanto tin hopi cambio y adaptacion na actividadnan tumando lugar den y pafor di hospital y cu awor nan ta usando bek e entrada principal cu a keda cla den su remodelacion. Ta ripara cu of nan ta bezig ta sigui schuif af of schuif op e carta cu e resultado di e Hoorzitting cu a tuma lugar dia 15 di januari ultimo, den cual nan no por a contesta ningun di nos preguntanan, un hoorzitting cu nan a prohibi nos di filma pero cu nan si kier a filma pa nan notulennan, cu un laptop nan dilanti, pero cu no ta duna impresion di ta profesionalnan. Pues ningun partido a filma e Hoorzitting.
Punto ta , cu nan a neglisha nos mama y ningun zaalarts y ningun specialista a bin atende cu nos mama ora su sucu a baha y keda baha te bao zero cu a causa un otro stroke. Dokternan cu ta traha solamente fey distancia fey di nan lessenaar telefonicamente y ta sigui duna opdracht pa mas infuus y mas glucose, cu hasta e zusternan a perde cabes pasobra ora nan yama pa un dokter, e contesta cu a hanja ta cu dokter ta druk. Podise nan kier hinka e susedido aki den nan doofpot, pero pueblo no ta lubida, pasobra nos a hanya reaccionnan di hendenan cu tambe a pasa den un mal experiencia cu un miembro di nan famia y cu tambe a fayece. Nos a bisa nan den e Hoorzitting cu un persona no ta un dokter professional cu curason si e ta studia pa logra solamente e titulo, of obtene e jas blanco y of e salario. Ta e zuster y verpleegkundigennan ta hasi e trabao di dokter pa nan, mientras cu e asina yama dokternan ta just skirbi receta y duna ordo pa pone infuus y glucose, locual a pasa cu nos mama.
Ta 6 luna caba cu nos a despedi di nos mama y despues nos tata y nos ta sigur cu nan ta na paz den luz eterno, pero no hoef di a wordo pusha den nan morto pasobra mama a drenta hospitaal y a bira mas malo eyden pa falta di atencion adecuado y debido. HOH podise tin falta di staf y personal, pero no por ta asina cu no tin ningun dokter available pa wak e patient y of papia cu famia di e patient ariba nan peticion. Foei ! No sea un dokter di ganja ganja, no sea un dokter superficial. Como un pensionado nos tambe sa cu hopi lugar falta di trahador. Nos tambe sa cu prijsnan di cuminda ta subi regularmente. Y nos sa cu awendia jan en allemaal por studia pa bira dokter di esaki of dokter di esaya. Wak prome den bo curason si bo ta stima bo prohimo mescos cu bo mes, pa su bida den bo man of bo mesun bida den un di bo colleganan cu no ta worry con tratabo. Nos tur sa cu ta Dios tin e ultimo palabra. Pa medio di esaki nos ta bolbe aserca e klachtencommissie di e Hoorztting di HOH cu nos pregunta, cuanto luna mas tin cu warda riba e carta chombom cu talbes no lo tin ningun validez, nos no ta interesa den hanya e informacionnan di boso cursonan nobo y of cambionan y adaptacionnan, nos kier sa pakiko boso no ta yuda nos grandinan cu e mesun atencion cu esnan mas hoben. Pa awe, te aki nos relato.
Danki pa boso atencion di curason, pasa un bon dia yen di alegria y un ‘bearhug’ di Ruthy Lady Ruth. P.S. Nos a manda un carta atrobe pa e secretaria di klachtencommissie cu copia pa prensa. Mi ta puntra mi mes, si mi tawata un politico cu a pasa den algo asina, si e si lo a wordo atendi y yuda na forma relampago ? Si ta un di nan grandinan a pasa den algo asina kiko nan lo a hasi ? Manera ta bisa na ingles :’ Food for thought’.
