Loke ta cuminsa como un rumor di diabierna atardi, a bira un realidad: e homber encarga cu e seguridad di Prome Minister Mike Eman ta wordo vincula cu baho mundo di droga y arma. Diabierna atardi husticia a drenta su cas na Madiki y detene Sandro Lopez.
Un sla pa integridad
Esaki no ta djis un incidente isola; esaki ta un sla directo na e credibilidad di Mike Eman su circulo di confianza. Con por ta posibel cu bou di nanishi di un lider politico, den su propio auto y usando su mesun plataforma di poder, tabata facilita operacionnan criminal?
E pregunta cu henter pueblo ta haci awor ta: con Eman a permiti esaki?
A presta Mike hopi placa pa campaña:
Por bin compronde tambe di fuentenan hopi cerca, cu e mes persona aki a pomp placa den campaña pa Mike Eman, anto no tiki placa, pero miles y miles. Manera nan ta bisa: “caya ta papia”
Karma Politico?
Ta fresco ainda den memoria con e mesun oponentenan politico aki tabata lansa atakenan feros contra Evelyn Wever-Croes. Sinembargo, den menos di un aña, e cos a bolter. Karma no ta pidi permiso pa bati na porta, y awor e enfasis ta riba e “ehempel” cu Mike Eman ta pretende di ta. Ora esun cu mester cuidabo ta esun cu ta hunga den baho mundo, e ora ey bo no ta ofreciendo proteccion, sino un capa di faciltador.
Preguntanan cu Mester di Contesta
E investigacion aki, maske hermeticamente cera, ta lanta pregunta cu no por keda sin contesta:
Pa ken e armanan tabata destina?
Con leu e influencia di e traficacion aki a penetra den e oficina di Mike Eman?
Ta uza e inmunidad di un prome minister pa move ilegalidad sin ser cuestiona?
Na final
Aruba no por permiti pa e lineanan entre liderasgo politico y criminalidad sigui bira mas fini. Si e persona cu ta sinta banda di e lider ta esun cu ta hiba arma y droga riba caya, e ora ey e lider tin hopi di splica. Mike Eman no por sconde tras di silencio e biaha aki; e integridad di nos sistema democratico ta na wega.
