Parlamentario di AVP, Jennifer Arends-Reyes, a participa den un reunion publico den Parlamento tocante e presentacion di AWSS Aruba Wastewater Sustainable Solution, unda a reconoce e trabou cu e entidad ta haci pa fortalece e sistema di saneamento na Aruba.
“Mi kier gradici Señor Presidente, colega Parlamentarionan, Minister Dowers, y e representantenan di AWSS, Sr. Everon y Sr. Ruiz, pa e presentacion di awe mainta. Nos a haya un bista mas claro di e reto nan, pero tambe di e compromiso cu AWSS ta mustra pa mehora e situacion,” Arends-Reyes a declara.
Segun e parlamentario, e reunion a sirbi pa identifica puntonan importante cu mester fortalece, manera necesidad di mas personal, mihor control, mas material, inversion continuo, implementacion efectivo y handhaving. “Esaki ta elementonan esencial pa garantisa cu Aruba por sigui crece sin compromete salud publico y sostenibilidad.”
Un di e temanan cu a haya hopi atencion ta e situacion di desperdicio medico toxico cu tabata warda den mas cu 60 container. Arends-Reyes a describi esaki como un reto serio, pero a duna credito na e esfuerzo pa bin cu un solucion concreto pa maneha e problema di manera responsabel.
Arends-Reyes a enfatisa cu AWSS, como un NV responsable pa saneamento, sistema y tratamiento di awa sushi, ta un pilar clave pa un Aruba limpi y sigur “Saneamento ta un fundeshi pa nos turismo, nos medio ambiente y nos calidad di bida.”
E parlamentario a toca tambe riba e Aruba Sustainability Fee, cu ta cobra riba turista desde 6 di december 2024, y a indica cu e mecanismo aki por yuda pa cubri e costo di infrastructura. Segun Arends-Reyes transparencia ta importante, pa pueblo por sa con ta bayendo cu AWSS.
Arends-Reyes a conclui cu Aruba tin un oportunidad pa fortalece e sistema di saneamento cu un masterplan y un roadmap di inversion. “Cu cooperacion y responsabilidad, nos por logra un Aruba mas sostenibel pa e proximo generacion.”
