Oranjestad – Den e caso conoci di Leoncita Arends, Hoge Raad der Nederlanden a confirma e condena contra e sospechoso principal. Cu e decision di 14 april 2026, Corte a rechasa tur reclamonan presenta den casacion y a determina cu e sentencia anterior ta keda na vigor. Esaki ta nifica cu despues di varios aña di investigacion y proceso legal, e asunto a yega na su fin definitivo sin ningun cambio den e resultado.
Leoncita a wordo condena anteriormente pa fraude (oplichting) y corupcion (omkoping). E castigo ta un condena di 24 luna di prison, di cual 12 luna condicional, cu un periodo di prueba di tres aña. Corte a considera cu e castigo ta proporcional na gravedad di e hecho, tumando na cuenta cu su actonan a afecta tanto e gobierno como e confianza den e sistema publico.
Segun e tribunal, Leoncita a traha hunto cu Benny pa obtene derecho riba terreno di gobierno (erfpacht) bou di intencionnan falso. Companianan a wordo usa pa pidi e terreno, pero nan no tabatin recurso, experiencia ni plan concreto pa desaroyo. Corte a determina cu e berdadero intencion tabata pa bende e companianan despues di haya e derecho “optie”, pa logra ganashi financiero rapido sin realisacion di ningun proyecto.
Den e proceso, a wordo presenta informacion engañoso cu a crea e impresion cu tin proyectonan serio y bon prepara. Den e peticionnan, a menciona futuro plan di construccion y inversion, pero investigacion a mustra cu esaki no tabata berdad. Sinembargo, prueba a mustra cu e companianan tabata basicamente bashi y no tabatin capacidad pa realiza ningun desaroyo, ni financieramente ni tecnicamente.
Ademas, Corte a conclui cu tin acto di corupcion. Un testigo importante a declara, cu riba instruccion di e sospechoso, un envelope cu placa a wordo entrega na casa di e minister. Corte a considera e declaracion consistente y confiabel, y a indica cu e pago tabata conecta directamente cu e otorgacion di e derecho di tereno. E momento di e pago, segun prueba, ta coincidi cu e periodo den cual e derecho a wordo firma y otorga pa Benny y na mes momento e compania a wordo bendi.
E tribunal a enfatisa cu, aunke gobierno mester sigui procedimiento corecto y cuidadoso, e tin derecho di confia cu su funcionario ta actua integro y segun ley. Den e caso aki, segun Corte, e confianza aki a wordo abusa deliberadamente pa beneficio personal, usando posicion y influencia pa logra ventaha.
Corte Supremo a indica cu e argumento di defensa, cu departamentonan di gobierno mester a haya e trampa mas tempran, no ta valido. Segun Corte, e manera cu e plan a wordo organiza, incluyendo uso di otro persona como director y uso di companianan sin actividad real, a haci cu e trampa/engaño no tabata facil pa detecta durante e proceso normal.
Tambe a wordo señala, cu aunke finalmente e tereno a wordo desaroya door otro inversionistanan despues di benta di e companianan, esaki no ta cambia e hecho cu inicialmente a wordo comete fraude. E ley ta proteha no solamente perdida financiero, sino tambe confianza y honestidad den trato economico y administrativo.
Cu e decision aki, Leoncita a yega na su conclusion den mas halto instancia hudicial. E condena contra e sospechoso ta definitivo, y Corte a manda un señal cla cu fraude y corupcion den sistema publico, lo wordo trata cu seriedad y sanciona conforme ley.
Na final, tur caminda legal a termina y awor e unico caminda cu ta keda ta pa sinta e castigo imponi pa corte. Esaki ta nifica cu “Busje komt zo” pa Leoncita Arends unda e mester presenta na prison pa sinta su castigo.
