Parlamentario Drs. Shailiny Tromp-Lee ta reacciona riba e intentonan iresponsabel di fraccion di AVP pa crea un scenario di duda y malinforma comunidad rond di e Jaarrekening 2020.
Tromp-Lee ta condena e narrativa falso di e fraccion aki, mustrando cu nan ta uza un rapport tecnico di Algemene Rekenkamer (ARA) pa gaña pueblo cu insinuacionnan di corupcion cu simplemente no ta existi.
Malinformacion pa Probecho Politico
Tromp-Lee a clarifica cu e rapport di ARA ta señala deficiencianan administrativo cu a surgi den un tempo di catastrofe mundial. Na ningun momento e rapport ta papia di corupcion. “Insinua esaki ta un acto di desesperacion politico di AVP pa purba mancha un liderazgo cu a scoge pa salba bida prome cu burocracia,” Tromp-Lee a declara. E Parlamentario ta enfatisa cu AVP ta uza terminonan manera “ilegal” pa spanta y crea duda den pueblo, lubidando cu na 2020 e prioridad tabata pa 25.000 famia no muri di hamber y pa nos pais mantene cabes riba awa.
Sugerencianan di ARA pa contra-aresta malinformacion
Parlamentario Tromp-Lee ta enfatisa cu, en bes di keda biba den pasado buscando culpa, e enfoke mester ta riba e conclusionnan constructivo di ARA. ARA mes ta indica cu e les di mas grandi cu e crisis a laga atras ta e urgencia pa Aruba conta cu un plan di crisis coherente y un sistema digital unifica. Parlamentaro Tromp-Lee ta clarifica, cu si nos sistema administrativo tabata debil, ta netamente pasobra nos a hereda un aparato gubernamental sin inversion den tecnologia y y financieramente debilita pa e MEGA debe cu AVP a laga atras. Na lugar di crea duda innecesario, AVP mester splica e pueblo pakico nan no a fortifica nos institucionnan ni inverti den digitalisacion ora nan tabata den gobierno.
Asunto resolvi y legalisa na 2022
Tromp-Lee a recorda comunidad cu e falta di base legal temporal cu ARA a constata ya a wordo legalisa pa Parlamento na aña 2022. “E discusion legal aki ta un capitulo sera. Nos a formalisa e yudansa, nos a duna cuenta y nos a legalisa e sosten di FASE añanan pasa.” Tromp-Lee ta aclara. E fraccion di AVP ta persisti den un retorica riba asuntonan cu ya a keda legalmente resolvi, esaki ta un indicacion di nan falta di vision pa e futuro di nos pais. Nan unico strategia ta crea duda caminda tin transparencia.
Vision pa Futuro
Parlamentario Tromp-Lee ta reitera cu su enfoke ta keda firme riba e mehoracion di control digital y e preparacion di leynan di emergencia. El a enfatisa cu den e reunion di dia 4 di juli, a aproba e base legal necesario pa asina no permiti e criminalisacion di e yudansa cu a mantene Aruba stabiel den su pio momento. “Liderazgo den crisis ta nifica curashi pa actua, no sconde tras di burocracia mientras pueblo ta sufri,” Tromp-Lee a conclui.
