Loke ta caracterisa e maneho di Minister di Finansa, Economia y Sector Primario,
Geoffrey Wever, ta e echo cu e interesnan di comercio ta prevalece riba bienestar di e ciudadano comun. Mientrastanto cu sector comercial ta gosa di incentivonan fiscal atractivo, e “homber chikito” ta keda bashi, cargando e peso di un costo di bida cu cada dia ta bira mas insoportabel.
Un Pueblo Castiga pa e Costo di Bida
E ciudadano Arubano ta wordo continuamente castiga cu un aumento descontrola di prijsnan di prome necesidad. For di gas, gasoline y diesel, te na productonan basico manera lechi y koffie; e sla ta bin di tur banda y tur dia. Mientrastanto, nos ta nota un Minister Wever sin ningun empatia y cu un falta di atencion pa e realidad alarmante di e famianan cu mas mester di un alivio real.
E Reality Check di CBS: Clase Media den Peliger
Cifranan recien di Central Bureau voor de Statistiek (CBS) ta confirma loke nos ta sinti den nos cartera: e costo di bida na Aruba ta keda aumenta. E bestaansminimum a alcansa nivelnan critico cu no por wordo ignora:
- Hogar di cuatro persona (dos adulto y dos mucha): mester di un minimo di Afl. 5,551 pa luna pa sobrebibi.
- Persona soltero: mester di Afl. 2,636 pa cubri gastonan basico..
Esaki ta nifica cu un persona so tin un deficit di entrada di mas di Afl. 650, considerando cu e sueldo minimo ta rond di Afl. 1,900. E buraco financiero aki ta e rason pakico Banco Central mes a adverti cu e clase media na Aruba ta desapareciendo.
Desbalansa den Incentivo Fiscal
E maneho actual ta parse di ta diseña pa sirbi solamente e sector comercial. Minister Wever a introduci medidanan unda comerciantenan cu ta inverti den centro di Oranjestad ta keda exonera di paga Winsbelasting pa 10 aña y BBO/BAZV pa 3 aña. Ta trata di inversionistanan cu ya caba tin e capital necesario, pero toch ta ricibi “tax breaks” generoso di Gobierno.
Mientrastanto, e ciudadano no ta ricibi ningun alivio fiscal. Al contrario, e pueblo mester cumpli estrictamente cu tur impuesto mensualmente; cualkier fayo den esaki por hiba na perdida di propiedadnan personal y te hasta nan propio hogar. Pa e pueblo, no tin “tax break”, tin solamente e “strangulacion” di nan entrada.
Prioridadnan Eroneo y Fondonan Secuestra
E critica ta bira mas fuerte ora nos analisa e prioridadnan di gasto di e Ministerio aki. Mientras nos pueblo ta sufri, e malgasto di placa publico ta sigui su curso sin ningun piedad. Ta proyecta un imagen di luho cu biahenan constante y e lease di shete auto electrico nobo, locual ta un insulto directo na e realidad economico di nos pais.
Pio ainda, Minister Wever tin 50 miyon florin den un fondo di inversion “secuestra”, scondi y sin uza, mientrastanto cu e por a destina esaki pa alivia e presion financiero riba nos famianan. En bes di un yudansa real, e Minister su “gran oferta” ta un miserabel un florin pa dia pa mitiga e aumento drastico di gasoline. Esaki no ta un yudansa; esaki ta un falta di respet total pa e realidad cu nos pueblo ta biba den dje tur dia.
Ora nos mira rond den region y mundo, e diferencia di maneho ta visibel
- Hulanda: A presenta un “Iran-pakket” di un biyon euro pa frena e aumento di prijsnan.
- St. Maarten: Gobierno ta absorba e subida di gasoline pa proteha e cartera di e ciudadano.
No por ta asina cu ta strangula e ciudadano comun mientrastanto cu ta privilegia comerciantenan rico. Ta ora pa un cambio di rumbo; ta ora pa un maneho economico cu berdaderamente tin e homber chikito como prioridad.
Minister, pa ken bo ta goberna: pa e par di comerciante den Caya Grandi, of pa e pueblo cu ta carga e pais aki riba nan lomba?
