Arubaanse Voetbal Bond (AVB) a anuncia oficialmente e partido final di Division Damas Open-Class, unda e ekiponan di S.V. Britannia y S.V. Estrella lo topa otro pa disputa e titulo maximo di campeon di Aruba.
E encuentro decisivo aki lo tuma luga e diabierna aki, 24 di april, pa 8:30 di anochi riba tereno di Centro Deportivo Guillermo Prospero Trinidad (CDGT). Porta pa publico lo habri un ora prome, esta pa 7:30 PM, pa ricibi e fanaticada di ambos organisacion.
Reglanan di e partido
Mirando e importancia di e wega, AVB a stipula e reglanan den caso di un empate:
- Si no tin un ganador den tempo reglamentario, lo hunga dos tempo adicional di 15 minuut cada uno.
- Si e empate persisti, lo defini e campeon pa medio di tironan penal (5 pa cada equipo).
- Si ainda no tin un decision, lo sigui cu e tironan penal te ora cu tin un ganador.
Pa loke ta e hungadonan, cada club por tin un maximo di 11 suplente riba banki y por realisa te cu 7 cambio durante e partido.
Ceremonia y premacion
E protocol di inicio lo ta uno special, cuminsando cu e Himno di FIFA sigui pa e Himno di Aruba. AVB lo tin su fotografo oficial presente pa capta e momentonan di mas emocionante di e wega y e ceremonia di premacion.
Tanto e campeon como e sub-campeon lo ricibi un total di 30 medaya y un copa como reconocimento pa nan esfuerso durante e temporada.
Informacion pa fanaticada
AVB ta invita e pueblo di Aruba y e fanaticonan di ambos equipo pa asisti y apoya nan hungadonan.
- Entrada: Adulto ta Afl. 10,00 y mucha te cu 12 aña ta Afl. 5,00.
- Ubicacion: E fanaticonan por haci uso di e tribuna parti ariba (sin dak) caminda e cashier lo ta situa.
AVB ta desea ambos organisacion hopi exito den e gran final aki y ta pidi e entrenadornan pa cuminsa cu nan warming-up na tempo pa garantisa cu e wega ta inicia exactamente pa 8:30 PM.
