Diadomingo 19 di april, Aruba a uni su mes na e movecion global di ‘Good Deeds Day’. Scouting Aruba, como organisado principal, a bini hunto cu Parlamento Hubenil, Poder di Hubentud y Fundacion Believe in Yourself pa realisa un proyecto special dedica na e casnan di cuido di nos adulto mayornan.
Bou guia di HKC Adelin Trimon-Geerman, cu sosten di HC Dave Martinus y demas miembro i hoofdbestuur di Scouting Aruba a scohe pa un meta hopi special: e recoleccion di comestibel y, mas importante, comparti tempo y amor cu nos adultonan mayor. Pa garantisa un ambiente trankil y placentero pa e bishitantenan y e residentenan, a opta pa traha cu delegacionnan representa pa e gruponan ariba menciona. Esaki a permiti un interaccion mas personal y profundo, evitando aglomeracion den e casnan di cuido. E dia no a trata solamente di e entrega di donacion, sino di e balor di bida cu e hobennan a siña: e importancia di bridge e “gap” generacional y duna atencion na esnan cu a traha pa nos pais. E casnan di cuido bishita a keda sumamente gradecido y emociona cu e bishita, resaltando cu e presencia y e combersacionnan tabata e regalo di mas grandi. E actividad a clausura bao di un sombra di palo, unda a tuma e oportunidad pa gradici tur presente specialmente e drivernan cu a percura pa e transporte, como tambe tur boluntario y persona cu di un of otro manera a duna un man pa haci e actividad aki posibel. E boluntarionan a comparti nan experiencianan, a ricibi nan certificado di participacion y un ‘goodie bag’.
Gratitud na nos Sponsornan
Un proyecto di e magnitud aki no por tabata posibel sin e curason generoso di nos comercio local. Scouting Aruba ta extende un danki di curason na: Ecotech, Martijn Trading, Romar Trading, Subway, Oduber Agencies, Caribbean print center, Satex, El Louvre, Windcreek Hotel, Divi & Tamarijn All Inclusive Hotel, Tec NV, La Moderna, Costa Linda y tur e trahadornan di Costa Linda Hotel kendenan a uni pa colecta e comestibelnan necesario.
Actividad Global
Good Deeds Day ta un movecion global cu ta wordo celebra den mas di 110 pais, unda miyones di persona ta bini hunto pa haci bon pa nan comunidad. Scouting Aruba ta orguyoso di por a fungi como e motor tras di e iniciativa aki na nos isla. Desde awor, e organisacion ta invita henter comunidad pa marca e fecha den nan calender: otro aña, Good Deeds Day lo wordo celebra dia 18 di april 2027.
