Grupo di adulto mayor Honey Bees Dakota a celebra nan 10 aña di existencia, marcando un decada di encuentro, amistad y actividad den comunidad.
E celebracion a inicia cu un desayuno ameno, caminda e bista di alegria tabata visibel riba cara di cada miembro. Un momento di hopi orguyo tabata ora cu e grupo a uni nan bosnan pa canta nos Himno Nacional, sigui pa e propio himno di Honey Bees, simbolisando e union y e identidad fuerte cu nan a cultiva den e ultimo decada.
E mainta a conta cu presencia di Minister Wyatt-Ras, kende a comparti un rato ameno cu e miembronan di Honey Bees pa felicita nan personalmente cu e bunita aniversario aki. Durante e añanan, Honey Bees a crea un espacio caminda adultonan mayor por reuni regularmente pa comparti, mantene nan actividad social y fortalece lasonan di amistad. Iniciativanan manera esaki ta contribui directamente na bienestar emocional y calidad di bida di nos adultonan mayor.
E Ministerio di Salubridad, Asunto Social, Cuido di Adulto Mayor y Maneho di Adiccion ta reconoce e balor di grupo comunitario manera Honey Bees, cu ta promove participacion activo y inclusion social.
“Nos adultonan mayor ta un pilar importante den nos comunidad. Iniciativanan manera Honey Bees ta mustra con union, atencion y actividad social por haci un diferencia real den bida di nos adultonan mayor,” segun Minister Wyatt-Ras.
Cu e celebracion aki, e Ministerio ta reafirma su compromiso pa percura cu e calidad di bida di nos adultonan mayor ta keda un prioridad den nos sociedad, mirando e impacto positivo cu e tipo di asociacionnan aki tin pa Aruba. Na nomber di e Ministerio, nos ta felicita grupo Honey Bees Dakota cu nan 10 aña di dedicacion y ta desea nan hopi exito den e añanan cu ta bin.
