Diabierna ultimo, Minister di Finansa, Asunto Economico y Sector Primario, mr. Geoffrey Wever, a ricibi directiva di Aruba Fair Trade Authority (AFTA) pa entrega oficialmente nan jaarverslag 2025. E entrega aki ta confirma e compromiso continuo cu transparencia, bon gobernacion y consolidacion di un mercado moderno y husto pa Aruba.
Desde su fundacion riba 1 di januari 2024, AFTA a bira un pilar importante den e proceso pa crea un ambiente economico unda empresanan por competi di forma husto y consumidornan por beneficia di mihor servicio, innovacion y prijsnan mas competitivo. Como autoridad independiente, AFTA ta opera cu su propio competencia legal y instrumentonan pa supervisa mercado y actua ora practicanan inhusto surgi.
Den e jaarverslag 2025, AFTA a presenta e progreso logra durante su di dos aña operacional, incluyendo fortalecemento institucional, proceso di investigacion, orientacion na empresanan y preparacion pa e siguiente fase di proteccion di consumidor. Esaki ta mustra cu Aruba no solamente a crea e cuadro legal necesario, pero cu tambe ta duna contenido real na reformanan cu ta modernisa nos economia.
Proteccion di consumidor ta sigui ta un prioridad strategico pa Minister Wever. P’esey, Gobierno a sigui traha den cooperacion cu AFTA riba instrumentonan legal y regulatorio pa fortalece e posicion di consumidor den mercado. E meta ta pa garantisa cu e ciudadano tin mas seguridad, mas informacion y mas proteccion contra practicanan comercial inhusto.
“Mi ta sumamente contento cu AFTA a sigui crece y madura como institucion. Den poco tempo nan a demostra cu Aruba por tin un autoridad serio, profesional y efectivo cu ta boga pa competencia husto y proteccion di nos ciudadano. Un economia fuerte mester tin reglanan cla y husto pa tur hende,” segun Minister Geoffrey Wever.
Minister Wever a enfatisa cu un mercado ordena y confiabel ta esencial pa atrae inversion, stimula emprendemento y amplia oportunidadnan pa empresanan local. “Ora inversionista mira cu Aruba tin institucionnan independiente, transparencia y seguridad huridico, nan tin mas confiansa pa inverti na Aruba. Esaki ta traduci den empleo, crecemento economico y mas bienestar pa nos comunidad.” minister Wever a comenta.
Cu entrega di e jaarverslag 2025, AFTA ta confirma cu Aruba ta avansando cu accionnan concreto den construccion di un economia mas competitivo, moderno y resiliente, completamente den linea cu e Programa di Gobernacion AVP-FUTURO 2025-2028.
Pa mas informacion tocante AFTA y su trabounan, por bishita nan website oficial: www.afta.aw
