Durante su bishita di trabou na Den Haag, parlamentario Eduard Pieters, a haya un confirmacion cla di un vision cu el a defende pa hopi aña: enseñansa mester conecta directo cu realidad di trabou. Na ROC Mondriaan, un instituto di enseñansa vocacional, Pieters a mira con teoria y practica ta integra den un manera, cu ta prepara e studiantenan pa mundo real, no solamente pa haya trabou, pero pa sobresali tambe den dje.
Un modelo cu ta traha y cu Aruba por adapta
“E diferencia aki ta den e entorno,” Pieters a splica. “E studiantenan ta siña den un ambiente cu ta replica e industria mes; hotel, cushina y servicio. Esey ta crea seguridad, experiencia y e nivel desea.” Esey no ta solamente enseñansa, sino un preparacion real pa un industria competitivo, manera ta conoci den e sector hotelero. Pa Pieters, esaki ta un ehempel cla con Aruba por fortalece su propio sistema, specialmente den un sector clave y importante manera turismo.
Turismo di calidad mester talento di calidad
Aruba ta move den direccion di un modelo di turismo mas selectivo: high value, low impact tourism. Pero e cambio aki no por sosode sin inversion den nos propio hendenan. “Nos no por papia di turismo di calidad, si nos no ta forma e profesionalnan di calidad,” Pieters a enfatisa.
Esey ta nifica: miihor formacion, mas oportunidad pa nos hobennan y un caminda bon delinia for di estudio te liderazgo.
Di operacion pa liderato
Un di e puntonan mas importante di e bishita tabata e enfoke riba crecemento profesional.
Na Mondriaan, e studiantenan no ta limita na rol basico. Nan tin acceso na un trayecto cu por hiba nan te nivel di management. “Nos mester forma no solamente empleadonan, pero tambe nos lidernan di futuro,” Pieters a bisa. Y pa Aruba, esaki ta crucial, pasobra sostenibilidad di nos economia ta depende di e nivel di nos propio talentonan.
Cooperacion como punto clave pa futuro
Pieters a subraya tambe e importancia di colaboracion internacional. E relacion entre Mondriaan y EPI, cu e experiencia existente cu Corsou y e otro partnernan, tin oportunidad real pa crea un ecosistema educativo cu ta conecta Caribe cu Europa. “Nos tin e oportunidad pa traha hunto y crea un coriente di talento fuerte pa nos region,” el a indica.
Un direccion positivo, pero cu mester accion
E bishita na ROC Mondriaan a confirma cu Aruba tin e potencial pa crece den direccion corecto.
Pero pa Pieters, e mensahe politico ta cla: inversion den enseñansa mester bira prioridad, conexion cu industria mester fortalece y nos hobennan mester haya mas herment pa logra exito.
“Nos tin talento. Awor ta cuestion di mehora e sistema cu ta duna nan e oportunidad pa sobresali,” Pieters a conclui. Futuro di Aruba no ta solamente den turismo, sino tambe ta den con nos ta prepara e hendenan cu mester traha y maneha e industria ey.
