Dios ta stima hende sincero, sinceridad ta importante pa Dios, hende cu no ta papia so , pero hende cu ta biba locual nan ta papia.
Pasobra den sinceridad di curason di hende, bo ta hanja sa e berdad completo. Y hende sincero ta cana den e berdad di Dios mescos cu Rey Ezequias a cana, mescos cu Daniel a cana, asina nos tin di cana, y Dios lo haci cosnan grandi den nos bida.
Ta para scirbi den Salmo 91:14-16 bisando: pasobra e a stima Mi, pesey lo Mi libre,lo Mi protehe, pasobra e conoce Mi nomber. E lo sclama na Mi,y Ami lo conteste,
Lo Mi ta cune den angustia,lo Mi rescate y honre, Cu bida largo lo Mi satisface,y lage mira Mi salbacion.
E sinceridad cual nos tin cu trata Dios cune ta mucho mas halto cu sinceridad humano, pasobra Dios conoce cada intento di nos pensamento, e conoce cada buelta den nos curason, prome cu nos papia Dios sa kico nos ta bay papia, y ningun hende no por ganja Dios.
Pesey ora Dios mira cu nos curason ta sincero, porta grandi ta habri den nos bida , pa motibo di nos sinceridad.
Confia den Senjor cu henter bo curason,y no depende riba bo mes comprondemento, den tur bo camindanan reconoc’E y E lo dirigi bo berehenan.
Sinceridad ta wordo demostra ora nos ta depende riba Dios, ora nos ta kere y confia y sa cu tur locual cu nos tin mester ta bini di Dios, pasobra ningun hende por ta independiente di Dios, Su palabra ta bisa nos, pega den Mi , boso por tur cos leu for di Mi boso no por nada.
Pesey e palabra ta recorda nos cu tur cos nos por den Cristo cu ta duna nos fortalesa.
Ata Bo ta desea berdad den e parti mas intimo,y den e parti scondi,lo Bo haci mi conoce sabiduria.
Tur hende cu ta sincero cu Dios, lo crece y madura, pasobra sinceridad ta vitamina pa crecemento.
Un matrimonio sincero ta crece y lo duna bon testimonio na nan yuinan.
Un trahado sincero semper por aspira na un puesto nobo cu un bon aumento di salario, pasobra Dios ta bendiciona hende sincero.
Sinceridad ta bal mas cu placa, pasobra sinceridad cu integridad a nace hunto ta dificil pa bo ta un hende integro y bo no ta sincero, no ganja bo mes.
Laga nos hala serca cu un curason sincero, yen di siguransa di fe,cu nos curasonnan purifica di un mal consenshi, y nos curpanan laba cu awa puro.Laga nos tene firme na e confiansa di nos speransa sin vasila.Pasobra Esun cu a priminti ta fiel.( Hebreonan 10:22-23).
Sinceridad ta base di tur cos caminda no tin sinceridad, no tin nada, pasobra no tin amor , ni tampoco balor di locual hende mester tin.
Den bida tin hende ta topa cu un bon muher of un bon homber pero pa falta di sinceridad tur cos ta cay na awa, pasobra e pilar di amor no ta bon tipo , ni bon curpa, pero e pilar di amor, matrimonio y bon relacion ta sinceridad.
Sinceridad ta pone hende stima nan yamada, cu Dios tin riba nan bida, sinceridad ta uni tur locual ta di Dios, Sinceridad ta pone hende para keto y fiha nan bista riba Dios, constantemente.
Hende sincero no ta wak nan propio interes, pero loke ta di Dios, y locual ta duna gloria na Dios, ta bini na prome lugar, y nan ta para firme pa esey.
Dios ta stima hende cu ta sincero.
Sinceramente, Pastor Marcel Balootje
