Fraccion di Mep ta pidi reunion urgente riba turismo: Aruba no por sigui ricibi mas y mas turista, e momento pa accion ta awor!

Fraccion di MEP a entrega un peticion urgente pa un reunion publico cu e minister di Turismo pa debati tocante e rumbo di turismo na Aruba y e falta di accion concreto pa ehecuta e modelo di High Value, Low Impact.

Despues di recuperacion economico despues di pandemia, e gabinete anterior, Gabinete Wever-Croes 2, a scoge conscientemente pa cambia rumbo: no mas turismo di cantidad, pero turismo cu ta crea mas balor cu menos impacto riba nos pais y nos comunidad. E decision aki a bin directamente for di e preocupacionnan den nos comunidad riba presion di turismo riba calidad di bida.

Sinembargo, segun MEP, e realidad actual ta mustra algo completamente diferente.

Enbes di controla crecemento, nos ta mira:

•⁠  ⁠Mas vuelo aereo y expansion di asientonan

•⁠  ⁠Mas yegada di turista

•⁠  ⁠Ningun limite pa proteha nos capacidad di carga

Esey ta nifica cu presion riba trafico, vivienda, infrastructura y medio ambiente ta sigui aumenta, e nos ciudadanonan mas y mas ta keha di e molesternan aki. Mas preocupante ta cu gobierno AVP Futuro no ta pone ningun atencion na esaki.

“Aruba no por sigui crece sin control. Nos ta un isla cu limitacionnan. Si nos no actua awor, e impacto lo bira mas dificil pa controla despues,” segun fraccion di MEP.

MEP ta enfatisa cu e discusion aki ta mas cu economia so. Turismo ta toca directamente e calidad di bida di nos pueblo, costo di bida, acceso na vivienda pa nos hobennan, proteccion di naturalesa y en general e futuro di Aruba.

Pesey, MEP ta pidi un reunion urgente pa haya clarificacion di gobierno riba algun punto.

•⁠  ⁠Concretamente con e modelo di High Value, Low Impact lo wordo ehecuta

•⁠  ⁠Con gobierno lo controla e crecemento di turismo

•⁠  ⁠Con expansion di vuelo ta cuadra cu e meta di menos impacto

•⁠  ⁠Ki medida concreto lo wordo tuma pa proteha calidad di bida di nos pueblo

Fraccion di MEP ta bisa cla: Aruba mester scoge un direccion.

“No ta cuanto turista nos ta ricibi lo defini nos exito, sino con nos ta maneha turismo pa beneficio di nos pueblo” lider di fraccion di MEP Evelyn Wever-Croes a duna di conoce.