No ta asunto di spanta hende, pero ta asunto di concientisa hende.
Ora nos ta papia di pueblo nos ta papia di tur hende, pasobra Dios no kier pa ningun hende bay perdi, pero pa tur yega na conocemento di e berdad.
No ta asunto di un hende so mester biba den santidad, pero tur hende mester biba den santidad, ningun hende cu ta biba den pica, of hende cu ta rechasa Cristo Hesus of hende cu no ta kere den Juan 3:16-19 y haci locual tin para scirbi den Romanonan 10:9-11 lo no por bay cu Senjor.
No ta asunto di religion, pero ta asunto di relacion, pasobra salbacion ta personal, no ta bay pa unda bo ta biba pasobra salbacion no ta den ningun pais pero den Solamente den Cristo Hesus ( Hechonan 4:10-12).
Ta hopi confusion tin den mundo, y ta hopi e enemigo ta usando pa bruha tera, hopi hende cu mester sa miho, ta cayendo den trampa di enemigo y otro nan cu ta sigi nan tambe ta haci mesun cos.
Shonnan no tin cuenta di fecha ni anja, stop di kere den 2030, den binti 2050 of cu ta Israel, Merca, China, Rusia,Iran, etc ta dicidi, pasobra ta para scirbi e Dia y e Ora ningun hende no sa.
Ta para scirbi cu ora e Cristo Hesus ta bini esun cu ta den cunuco no ta hanja chens di bisa esun cu ta den cas, ta para scirbi cu ora Cristo Hesus bini dos lo ta hunto uno lo bay y otro lo keda.
No sinta kibra cabes cu Rapto ni tampoco e di dos binida di Cristo, pero sea prepara, vigila, biba den santidad, pasobra sin pas y sin santidad ningun hende lo no mira Senjor.(Hebreonan 12:14).
Nos tur cu ta kere den Senjor sa cu algo ta bay sosode pasobra e scritura ta bisa asina, pasobra locual cu Hesus a bisa di dje den Mateo 24 y 25 ta mustra esey, locual tur profeta a bisa ta concluyendo, tur esaki nan ta Dios mes a papia cu nan, pa nos awendia por tene cuenta y hala mas serca Dios.
Cuidao pasobra tin hopi mentira ta bay rond, tin hopi hende emociona, ta papia cosnan pa hala hende su atencion riba nan mes, pa tene hende na linja, y hopi di e cosnan ey no ta berdad, berdad ta locual ta para scirbi den e Palabra di Dios, kere den esey y prepara pa e binida di Cristo.
Un cos nos tur mester sa, cu esun cu kere lo ta salba, y esun cu no kere lo bay perdi, no tin asunto di rico ni pober, no tin asunto di religion, ni tampoco e region den cual bo ta biba, tene na cuenta cu ora Cristo Hesus ta bini, e ta bini na tur caminda mesun momento, y esey rond mundo lo sa, e lo no aparece, awe na Israel, mayan Merca, y otro siman na Rusia y China, tur hende por lesa y bolbe lesa den den 1 Thesalonisensenan Capitulo 5:1-11, pasobra nos tur sa locual e Palabra di Dios ta bisa cu lo sosode den 1 Thesalonisensenan 4: 14-18.
Un cos nos mester sa cu cielo y tera lo pasa ma e palabra di Dios lo no pasa. ( Lucas 21:25-32).
Wak bon locual tin para scirbi den 2 Pedro 3:7-14, y laga nos hala mas serca Senjor y prepara pa Su binida.
Un biaha mas prepara pa Su binida, y no bay tras, tras di esnan cu ta ganja pa complace hende, pero corda cu salbacion ta personal.
Sinceramente, Pastor Marcel Balootje
