E caminda pa e Copa di Mundo 2026 (na Merca, México y Canada) ta birando un careda contra holoshi pa hopi strea di futbol. Lesionnan recien di hungadornan manera Serge Gnabry, Xavi Simons y Eder Militao ta causando dolor di cabes pa e seleccionadornan, net un luna prome cu e torneo cuminsa.
E hungadonan ta den un situacion dificil: nan mester hunga e fase final di nan clubnan na ful speed, pero a la bes nan mester cuida nan curpa pa no perde e cita mundialista.
Fechanan clave pa e seleccionnan:
- 11 di mei: Entrega di e “pre-lista” (35 pa 55 hungador).
- 1 di juni: Entrega di e lista definitivo di 26 hungador na FIFA.
E situacion pa pais:
- Alemania: Julian Nagelsmann a perde Serge Gnabry. Tambe tin duda riba e portero Ter Stegen y e delantero Kai Havertz.
- Argentina: Lionel Scaloni ta preocupa pa ‘Cuti’ Romero (lesion di rudia), kende tin mester di 5 pa 8 siman pa recupera. Tambe Nico González lo ta afo pa tres siman pa un problema muscular.
- Brasil: E golpi mas duro ta Eder Militao, kende a opera na Finlandia pa un lesion grave den su bitsep femoral. Carlo Ancelotti (como tecnico di Brasil) ya a perde Rodrygo caba anteriormente.
- Spaña: E preocupacion principal ta e hoben talento Lamine Yamal. E no lo hunga mas pa Barcelona e temporada aki pa motibo di un lesion muscular, cu e speransa di ta 100% recupera pa e Mundial.
- Francia: Mientrastanto cu Hugo Ekitike ta oficialmente afo, tur wowo ta riba Kylian Mbappé. E strea di Real Madrid lo no bolbe hunga te dia 10 di mei den e “Clásico” contra Barcelona.
- Inglatera: Thomas Tuchel tin miedo di e cansancio di su hungadornan. Figuranan manera Declan Rice y Bukayo Saka tin problema fisico constante despues di un temporada unda algun hungador a yega di hunga casi 70 partido.
Otro seleccionnan den incertidumbre:
E “virus” di lesionnan no ta pordona ningun hende. Colombia ta pendiente di James Rodríguez, Turkia no sa si Arda Güler lo ta cla, y Hulanda a confirma caba cu e talentoso Xavi Simons lo no por participa.
Cu apenas 42 dia falta pa e apertura di e Mundial, e seleccionadornan ta resa pa no perde mas hungado den e simannan final di e liganan Europeo.
