Anne Witsenburg, directora di Monumentenfonds Aruba, a hunga un rol clave den e restauracion di Cas Veneranda. El a comparti cu desde e prome momento cu a mira e edificio, e estado tabata sumamente deteriora, pero mesora a reconose e balor historico y potencial cu e cas tabatin.
Poco despues di asumi su rol como directora, Witsenburg a haya e oportunidad pa cuminsa pensa riba un futuro pa e edificio. Den combersacion cu Sra. Landa Merryweather, el a conoce mas profundo e historia familiar di e cas, loke a crea un conexion emocional y un speransa comparti cu algun dia e edificio lo wordo restaura y recupera su identidad como Cas Veneranda.
Durante e añanan, e proceso no tabata facil. Un incidente serio cu a afecta e edificio a pone mas presion riba su estado, pero gracias na accion rapido di instancia competente, parti importante di e structura a wordo preserva, manteniendo bibo e posibilidad di restauracion.
Un momento decisivo a yega ora Ministerio di Asuntonan Economico, bou liderazgo di Geoffrey Wever, a tuma iniciativa pa integra e edificio den e vision mas amplio pa revitalisa centro di Oranjestad. Esaki a marca e inicio di un trayecto concreto pa rescata e propiedad.
E proyecto no solamente a enfoca riba restauracion fisico, pero tambe riba sostenibilidad y accesibilidad. Cas Veneranda, ekipa cu solucionnan moderno manera panelnan solar y sistemanan pa reutilisa awa, hunto cu facilidadnan pa haci e edificio accesibel pa tur persona.
Ademas, e integracion di actividad economico manera un restaurant, lo contribui na dinamica nobo di e area, creando un punto di encuentro pa comunidad y bishitantenan.
Witsenburg a expresa su profundo gratitud na Prome Minister Mike Eman pa su compromiso continuo cu preservacion di patrimonio cultural. Segun Witsenburg, e forma cu Gobierno ta trata herencia cultural ta refleha un vision cla pa mantene historia bibo mientras cu ta construyendo futuro.
El a enfatisa cu proyectonan manera Cas Veneranda no ta solamente trata di restauracion di un edificio, pero di preservacion di identidad, memoria y conexion humano cu nos ciudad.
E ceremonia oficial a culmina cu e corte simbolico di sinta, marcando e finalisacion di e restauracion, un momento cu a confirma cu Cas Veneranda a bira un realidad como simbolo di historia, orguyo y revitalisacion.
