Den un paso importante pa fortalece acceso na informacion y orientacion laboral, a inaugura awe tardi e “Tienda di Ley Laboral” na MFA Savaneta.
Durante e acto, Prome Minister Mike Eman a expresa su aprecio pa e iniciativa, resaltando e importancia di acerca servicio di gobierno mas cerca di pueblo.
Segun e Prome Minister, e apertura di e oficina aki ta representa un forma concreto di duna comunidad mas acceso na informacion relevante riba derecho laboral, y na mes momento crea un espacio pa guia y orientacion.
“E tipo di servicio aki ta fundamental pa nos comunidad, pasobra e contribui na mas conocemento y tambe por yuda preveni conflicto laboral den un fase tempran,” el a indica.
Eman a enfatisa cu acceso na informacion corecto ta clave pa fortalece posicion di empleado y crea un ambiente di trabou mas sano, caminda dialogo por tuma luga prome cu situacionnan escala.
E iniciativa, lidera door di Minister di Turismo, Transporte y Labor Wendrick Cicilia, ta enfoca riba ofrece un punto accesibel unda empleado por ricibi orientacion, informacion y apoyo riba tema laboral.
Durante su discurso, e Prome Minister a elogia e vision tras di e proyecto, destacando cu esaki ta un ehempel di con servicio publico por adapta pa atende necesidadnan real di comunidad.
Ademas, Premier Eman a reconose e presencia y aporte di diferente partnernan social, incluyendo representantenan di sindicato y sector empresarial, como elemento esencial pa fortalece dialogo social den pais.
E apertura di Tienda di Ley Laboral na Savaneta ta forma parti di un esfuerso mas amplio pa descentralisa servicio y acerca servicio di gobierno mas cerca di ciudadano, creando oportunidad pa mas interaccion, conocemento y prevencion.
