Departamento di Impuesto (DIMP) den presencia di Minister di Finansa, Asunto Economico y Sector Primario, mr. Geoffrey Wever, a lansa oficialmente e di dos fase di e portal digital “BO impuesto (BOi)”, riba cual tur ciudadano y companía por wak su cobransanan di impuesto online y por haci un arreglo di pago online- un paso concreto pa modernisa nos departamento di impuesto, hacie mas eficiente y agradabel y pone mas control den man di nos ciudadano y empresanan.
E introduccion di e servicio nobo aki ta representa un paso concreto den e transicion pa un gobierno digital, mas eficiente, transparente y accesibel.
Pa prome biaha den historia di Aruba, ciudadano y comerciante por haya acceso completo na nan informacion fiscal directamente online, sin mester di bishita oficina of depende di proceso manual.
Cu e sistema digital aki, awo e usuario por:
- Wak nan cuenta completo online, incluyendo saldo habri y posibel restitutie
- Consulta historia di pago te 5 aña atras
- Crea areglo di pago flexibel te 24 luna
- Cuminsa pago dentro di 60 dia
- Actualisa datonan personal manera adres, cuenta di banco y mas
E sistema ta ofrece informacion realtime, duna e usuario tin control directo y inmediato riba nan situacion fiscal. E implementacion di e sistema digital aki ta elimina proceso burocratico innecesario, y ta pone mas control den man di ciudadano.
Entre e mehoracion principal:
No tin necesidad di pidi “rekeningoverzicht” via e-mail
No mester contacto directo pa yega na un areglo di pago
Transparencia total di tur transaccionnan
Acceso facil pa descarga di informacion pa uso administrativo
E cambio aki ta fortalece confiansa den gobierno y ta crea un relacion mas directo, moderno y eficiente cu e ciudadano.
Realisacion di e proyecto aki no tabata posibel sin e compromiso, vision y dedicacion di hopi profesional. Minister Wever ta gradici Sra. Luenne Pieters pa su empeño y contribucion clave den desaroyo di e portal digital aki. Tambe, un reconocemento profundo na tur e empleadonan di Departamento di Impuesto (DIMP) cu a traha cu dedicacion pa haci e proyecto aki bira realidad. Nan esfuerso ta un ehempel di servicio publico cu ta pone interes di pais na prome luga.
Minister Geoffrey Wever a enfatisa: “Cu lansamento di e servicio digital aki, nos ta duna ciudadano y empresa control directo riba nan obligacionnan fiscal. Esaki ta un paso importante pa un gobierno mas transparente, eficiente y orienta riba servicio.”
